Чпикай чаз са акьван малум туштIани, дуьньядин дережада машгьур лезги алимар, духтурар, суьретчияр ва маса пешекарар тIимил авач. Къенин ихтилат гьа ихьтинбурукай тир медицинадин илимрин доктор Жавид Къазиевич Къазиевакай я.
Ж.Къазиев 1953-йисан 20-ноябрдиз КцIар райондин Ясабуба хуьре муаллимрин хизанда дидедиз хьана. Адан буба Къази ва диде Сааханум Докъузпара райондин Миграгърин хуьряй я. Жавида юкьван мектеб агалкьунралди ва 1976-йисуз Азербайжандин медицинадин институтдин педиатриядин факультет яру дипломдалди куьтягьна. Педиатриядин рекьяй жегьил духтурди 1976-1977-йисара Бакуда кардик квай дидевални аялвал хуьнин къаравулда акъвазунин илимдинни ахтармишунрин институтда тежриба кIватIна.
Жегьил пешекарди вичин зегьметдин рехъ 1978-1980-йисара Азербайжандин кьилин клиникада гематологвиле кIвалахунилай башламишна. 1980-1984-йисара Москвада аспирантурада кIелна ва медицинадин илимрин кандидатвилин диссертация хвена. Гуьгъуьнлай Россиядин меркездин жуьреба-жуьре азарханайра, илимдин центрайра кIвалахна.
1991-йисалай бажарагълу ватанэгьлиди Италиядин ва Кувейтдин медицинадин идарайра зегьмет чIугуна. Гьа са вахтунда Анконадин (Италия) медицинадин институтда Европадин истемишунрив кьадайвал цIийи кьилелай чирвилер къачуна. 1997-йисуз ада медицинадин илимрин докторвилин диссертация хвена. Жавид Къазиеван талассемиядихъ галаз алакъалу ахтармишунрикай дуьньядиз раиж хьайила, адаз къецепатан са шумуд уьлкведай кIвалах теклифна.
2003-йисалай ам Италияда кардик квай гематологиядин Средиземный гьуьлуьн институтдин къвалав гвай кIарабдин мефтIедин трансплантациядин международный центрадин клиникадин директор ва Римда авай виридуьньядин талассемиядин центрадин регьбер я. Лезги алимдин чIехи агалкьунрикай сад мукалдиз ухшар анемия авай талассемиядикди азарлубурун мефтI куьчардай программа арадал гъун я. Машгьур алимдин къелемдикай 200-далайни гзаф илимдин кIвалахар хкатнава, абур дуьньядин жуьреба-жуьре уьлквейра чапдай акъатнава. Алай вахтунда ам Италияда пешедин рекьяй лап хъсан духтуррикай сад я.
Жавид Къазиеван бажарагълувиликайни машгьурвиликай шаир, журналист Седакъет Керимовадин “КцIар. КцIарвияр” энциклопедияда, писатель ва алим Гьаким Къурбанан “Виш зурба лезги” ктабдани малуматар гьатнава.
Куругъли Ферзалиев
