Алатай гьафтеда Махачкъалада, Дуствилин кIвале, республикада машгьур шикилчи Къудрат Алиеван кIвалахрин “Портрет территории” тIвар алаз выставка ачухуниз талукьарнавай мярекат кьиле фена. Ана РД-дин Общественный палатадин председатель Абдухалим Мачаева, РД-дин медениятдин ирс хуьнин рекьяй Агентстводин руководитель Заур Къагьриманова, РД-дин милли сиясатдин ва диндин крарин рекьяй министрдин сад лагьай заместитель Гьарун Давидова, “Лезги газетдин” кьилин редактор Мегьамед Ибрагьимова, РД-дин Общественный палатадин председателдин сад лагьай заместитель Алюсет Азизханова, жемиятдин, илимдин, яратмишдай интеллигенциядин векилри иштиракна.
Къейдна кIанда, Общественный “Дружба” советдин 2 йис тамам хьунихъ галаз алакъалу яз тешкилнавай шикилрин выставка Кьиблепатан Дагъустандин тIебиатдизни медениятдиз талукьарнава.
Мярекатдал сифте гаф рахай Дагъустандин Дуствилин кIвалин директордин заместитель Георгий Гьарунова Къудрат Алиеван яратмишунрин рекьикай куьрелди суьгьбетна. Республикада милли алакъаяр хуьнин, вилик тухунин ва мягькемарунин кардик кьетIен пай кутунай ада Къ.Алиевав Дуствилин кIвалин патай Гьуьрметдин грамота вахкана.
Бажарагълу шикилчидин кIвалахрикай чпин фикирар филологиядин илимрин доктор Фаида Гъаниевади, Лезги радиодин кьилин редактор Наира Рамазановади, Общественный “Дружба” советдин председатель Бадрудин Ибрагьимова ва масабуру лагьана.
Мярекатдин эхирдай Къудрат Алиева вичин кIвалахрин выставка тешкилуник пай кутур Дагъустандин Дуствилин кIвалин, “Лезгияр” обществодин кьиле авай ксариз, Заур Къагьримановаз сагърай лагьана.
Агьмед Магьмудов
