Дуьньяда яшамиш жезвай хаталу гьайванрикай сад крокодилдиз ухшар аллигатор я. Крокодилдилай тафаватлу яз, и гьайвандихъ гьяркьуь тIиш ава. Алай вахтунда абурун анжах кьве жуьре малум я: Америкадин аллигатор ва Китайдин аллигатор.

Абуру чеб яшамиш жезвай цин сергьятрив агатай гьайванрал гьасятда гьужумда. Аллигатордин гьужумдикай хкатун четин я. Са бязи чешмейра къейдзавайвал, и гьайванри инсанрал гьужум авур дуьшуьшарни жезва. Мисал яз, 2001-2006-йисара аллигаторрин гьужумрикди 11 кас кьена.

Пешекарри тестикьарнавайвал, виридалайни яргъи аллигатордал 5,8 метр алай, адан заланвални саки тонндив агакьнавай. Амма бязи пешекарри и делилдин якъинвилел шак гъизва. Абуру гьисабзавайвал, виридалайни еке Америкадин аллигатордин яргъивал 4,5 метрдилай са тIимил алатун мумкин я. Америкадин аллигатордилай Китайдинди гзаф гъвечIи я, адан яргъивилел 2 метр ала, са тIимил артухни хьун мумкин я.

Итижлу делилрикай сад ам я хьи, аллигаторар дуьньядин анжах кьве уьлкведа — США-да ва Китайда яшамиш жезва. Китайдин аллигатор терг хьунин къурхулувилик акатнава. ТIуьниз абуру балугъар, хъалхъас хъипер, къушар,  жуьреба-жуьре гьайванар ишлемишда.

Гьазурайди — Куругъли Ферзалиев