Дагъустан Республикади милли проектриз субсидияр гунин гьакъиндай икьраррал къулар чIугуна куьтягьнава, — хабар гана киш юкъуз ТАСС-диз Дагъустандин Гьукуматдин Председателдин Сад лагьай заместитель Гьажимегьамед Гьуьсейнова.
“Чахъ кутIундай 54 икьрар ава, абурукай кьведал гьеле къулар чIугунвачир. Садал къул чIугун тавунин себеб ам тир хьи, регионриз субсидияр гунин гьакъиндай РФ-дин Гьукуматдин къарар хемис юкъуз кьабулнай. Экуьнахъ РФ-дин Минэкономразвитияди чаз икьрардин текст рекье туна, чна адал къул чIугуна ва Москвадиз рекье хтуна. Кьвед лагьайди, Минтрансдин — пулунинди тушир икьрар лугьудайдал накь къул чIугуна”, — лагьана Гь.Гьуьсейнова.
Гьяд юкъуз Сочида кьиле фейи Россиядин инвестицийрин форумдал регионрин кьилерихъ галаз гуьруьшмиш хьайила, РФ-дин премьер-министр Дмитрий Медведева малумарна хьи, милли проектриз субсидияр гунин гьакъиндай икьрарар уьлкведин 95 процент регионри кутIуннава, ада амай субъектрин, гьа жергедай яз Дагъустандин руководстводизни, и месэла тади гьалда гьялун меслят къалурна.
Милли проектрихъ 12 хиляй паспортар ава. Абур агъадихъ галайбур я: демография, культура, здравоохранение, образование, яшайишдин кIвалер ва шегьердин шартIар, экология, рекьер, кIвалахдал таъминарунин шартIар яратмишун, илим, рекъемрин экономика, гъвечIи ва юкьван бизнес, международный кооперация ва экспорт. И милли проектар РФ-дин Президент Владимир Путинан майдин указда къалурнавай месэлаяр тамамарун патал тестикьарнавай. Абур 2024-йисалди уьмуьрдиз кечирмишун планламишзава.
«Лезги газет»
