Сулакдин дагьардал параболадин жуьредин куьрс хьанвай гуьзгуьдин муьгъ эцигда. Дагъустанда ихьтин къайдадин аттракционар гьеле садазни чидач. Мумкин я мукьвара чир хьун. Муькъуьн яргъивилел 50 метр кьван жеда. Ам саки кьве километрдин кьакьанда эцигда. Дуьз лагьайтIа, 1920 метрдин кьакьанда. Пермдай тир инвесторри чпин проектдиз “1920” лагьана тIвар ганва.
Проект уьмуьрдиз кечирмишун патал 10 гектар чил чарасуз я. Инвесторри гьеле вири туристриз бегенмиш чка — дагьардин винел алай килигдай майдан ахтармишнава. И кар уьмуьрдиз кечирмишиз хьайитIа, сифте машинар акъвазардай чка, администрациядин дарамат, кафе, гуьзгуьдин муьгъ ва “скайджанпинг” аттракцион пайда жеда. Дагьардин патав амфитеатрни эцигда. Анлай, мисал яз, дагьардин кьилел къугъвадай пагьливанризни килигиз жеда. Дагьардин кIаниз йигин махсус тадаракда аваз эвичIиз ва хкаж хъжеда.
Республикади проектдиз итиж авунва. Санлай къачурла, адан къимет миллиард манатдиз барабар жеда. Ам уьмуьрдиз пуд йиса кечирмишда. Фикирзавайвал, аттракциондиз йиса 350 агъзур турист къведа. Идалайни гъейри, проектди кIвалахдин цIийи чкаяр арадал гъида ва тамашуниз лайихлу и чка вилик тухунизни рум гуда.
«Лезги газет»
