Дуьньядин халкьарин дидед чIаларин йикъан сергьятра аваз 19-февралдиз “Лезги газетдин” редакцияди Махачкъаладин 59-нумрадин юкьван мектебда лезги чIалай ва эдебиятдай нубатдин олимпиада кьиле тухвана. РикIел хкин, редакцияди сад лагьай олимпиада шаз Кьурагь райондин мектебра 11-классра кIелзавай аялрин арада тешкилнай.
ЦIинин олимпиадада Махачкъала ва Каспийск шегьеррин мектебрин 7-классрин ученикри иштиракна. Мярекатдиз тIварар кьунвай шегьеррин вири мектебриз теклифнавайтIани, лезги чIалайни эдебиятдай чпихъ гьихьтин чирвилер аватIа чириз анжах 13 мектебдай атанвай.
Аялриз тамамарун патал гьар жуьредин тапшуругъар ганвай: “Зи рикI алай шаир” темадай сочинение кхьин, чIалайни эдебиятдай тестерин жуьредин 10 суал ва тест-диктант. Тапшуругъар, шегьердин мектебрин программайрин кьетIенвилер фикирда кьуна, Докъузпара райондин Къалажухрин хуьруьн юкьван мектебдин дидед чIалан муаллим, “Лезги газетдин” хсуси мухбир Куругъли Ферзалиева гьазурнавай.
Лагьана кIанда, олимпиададихъ са шумуд макьсад авай: хайи чIални эдебият хуьн ва вилик тухун, шегьердин мектебра кIелзавай аялриз дидед чIал кIанарун, абурун арадай алакьунар авай аялар винел акъудун, жемиятдин фикир хайи чIаларин месэладал желб авун ва масабур.
Аялрин кIвалахриз къиметар “Лезги газетдин” кьилин редактор Мегьамед Ибрагьимова ва Куругъли Ферзалиева гана.
Нетижаяр кьурла, малум хьайивал, 1-чкадиз Махачкъаладин 38-нумрадин гимназиядин ученица Сафия Абдурагьманова (муаллим — Алимат Мегьамедовна) лайихлу хьана. 2-чка Каспийск шегьердин 6-нумрадин юкьван мектебдин ученица Наиля Мусаевади (муаллим — Тамара Мегьамедовна) кьуна. Республикадин образованидин центрадин (РЦО, Каспийск шегьер) ученик Давид Алиев (муаллим — Гуьлмира Сефербеговна) 3-чкадиз лайихлу хьана. КIвенкIвечи чкаяр кьур аялриз 5, 3, 2 агъзур манатдин кьадарда аваз пулдин премияр, дипломар, “Лезги газетдин” 90 йис тамам хьунихъ галаз алакъалу яз акъудай ктабарни РД-дин милли сиясатдин ва диндин крарин министерстводи чара авур лезги шииратдин антологияр гана. Абурун муаллимрин зегьметни гьуьрметдин грамотаяр гуналди къейдна. Олимпиададин амай иштиракчийризни лезги шаирринни гьикаятчийрин ктабар багъишна.
Олимпиада тешкилунин карда куьмекар гайи Махачкъала шегьердин администрациядин образованидин управленидин ва 59-нумрадин юкьван мектебдин кьилевайбуруз “Лезги газетдин” редакциядин коллективди сагърай лугьузва.
Агьмед Магьмудов
