Мегьарамдхуьруьн райондин кьил Фарид Агьмедова ЦРБ-дин кьилин духтур Гьажибала Гьажиевич Беглероваз хайи югъ тебрикна ва 60 йисан юбилейдихъ галаз алакъалу яз ам «Мегьарамдхуьруьн район вилик тухуник пай кутунай» хурудал алкIурдай лишандалди къейдна. И гьакъиндай «Лезги газетдиз» райондин администрацияди хабар гана.
«Гьуьрметлу Гьажибала Гьажиевич! Квез 60 йисан юбилей рикIин сидкьидай мубаракрай! И вакъиадихъ галаз алакъалу яз, Мегьарамдхуьруьн райондин абадвал патал куьне тухузвай ибретлу, чIехи зегьметдай за квез чухсагъул лугьузва. Пешекарвал, пешедиз вафалувал, кIвалахдив жавабдарвилелди эгечIунин рафтарвал себеб яз и йисара куьне инсанрин патай гьуьрмет, алхишар къазанмишнава. Чна куь кIвалахдиз, хьанвай агалкьунрал акъваз тавуна, мадни вилик финин майиллувилиз еке къимет гузва. Къуй квехъ ва куь багърийрихъ мягькем сагъвал хьурай!», — лагьанва тебрикдин чарче.
Ф.Агьмедова духтурдиз Мегьамед Ярагъвидин портретни пишкешна.
«Лезги газет»
