РД-дин Кьилин патай тамам ихтиярар ганвай векил Энрик Муслимова Кьиблепатан территориальный округдин пресс-къуллугърин ва СМИ-рин руководителрихъ галаз совещание тухвана.
Ана Агъул, Дербент, Сулейман-Стальский, Кьурагь, Докъузпара, Къайтагъ, Мегьарамдхуьруьн, Дахадаев, Рутул районрин, Дербент ва Дагъустандин Огни шегьеррин пресс-къуллугърин ва СМИ-рин векилри иштиракна.
Совещание ачухуналди, Э.Муслимова муниципальный пресс-къуллугъри ва СМИ-ри санал кlвалахунин ва информациядин такьатрихъ галаз сих алакъа хуьнин важиблувал къейдна.
— Къе чи вилик гзаф важиблу месэлаяр ква, — давамарна ада. — Информациядин такьатри вири республикадин къамат арадал гъизва. Муниципальный газетрин коллективри гафунин таъсирлувал артухарун лазим я. Кимивилерикайни кхьена кIанда. Чи везифа инсанрин итижар патал кlвалахун я.
Анал муниципальный интернет-сайтрин кlвалахдизни кьетlен фикир гана, абур эвелни-эвел ишлемишзавай ксар патал къулайбур ва гьам шегьердикай, гьам райондикай тамам делилар гудайбур хьун лазим я.
Гуьгъуьнлай суьгьбет азад къайдада давам хьана, муниципальный интернет-сайтрин ва абурун хабарар социальный сетра гегьеншарунин месэлаяр веревирдна.
Мярекатдин эхирдай Энрик Муслимова кlватl хьанвайбуруз чухсагъул лагьана ва ихьтин гуьруьшар мукьвал-мукьвал тухудайдахъ инанмишарна.
Къагьриман Ибрагьимов
