Эхиримжи йисара федеральный до­тацийрал алай регионрин кьилер дотацийрилай ва хсуси доходар хка­жиз алахънава. Им, гьелбетда, хъсан кlва­лах я, эгер доходар артухардай мягь­кем база аваз хьайитlа.

Ихьтин шартlара жув яшамиш жезвай кlвал, куьче, жуван хуьр аваданламишунин, багърияр эхиримжи рекье твазвай сурарихъ гелкъуьнин фикирар аваз, алатай йисан сифте кьилерай Белиж поселокдин “Хпеж” микрорайондин агьалийри жемятдин собрание тухвана. Анал микрорайонда  кlватl хьанвай кьван месэлаяр веревирдна ва абур гьялунин мураддалди агъсакъалрин совет хкяна.

Зун гьа и советдин председатель, Белиж поселокдин депутатрин Собранидин председатель  Абдулазиз  Гьа­жие­вич  Сефербеговахъ  галаз гуьруьш хьана ва адавай агъсакъалрин советдин кlвалахдикай суьгьбет авун тlа­лаб­на.

— Чи микрорайондин агьалияр, патарай хтай са цlуд-цlувад хизан квачиз, вири хпежвияр я. Чи жемятди инлай ­виликни хуьруьн бязи месэлаяр, районрин администрацийрин гъил агакь тийидайла, тупламиш хьана, чпин хсуси такьатрин гьисабдай гьялайди тир. Гила гьялна кlанзавай месэлаяр генани гзаф хьанва. Чи микрорайонда авай сад лагьай месэла экверинди тир. Са жизви гар акъат­намазди, марф къванмазди эквер хкуддай. Суткайралди кухтадачир. Чlехи жезвай микрорайондиз трансформатордин къуватни бес жезвачир. Жемятди рагьметдиз фейи  касдин садакьа гунин адет хкудунин, сурар аваданламишунин, дигидай яд гузвай къанавар михьунин, микрорайондин куьчейра эквер тунин, поселокдин администрациядивай ким эцигдай чил чара авунин месэлаярни кудна.

Абур гьялун патал, гьелбетда, такьа­тарни герек тир. Сифте кьиле фейи жемятдин собранидал халкьди къарар кьабулна: рагьметдиз фейибурун тlвар­цlихъ гузвай садакьадин пулунин гьисабдай мергьяматлувилин фонд ачухин.

Рагьметдиз фейи касдин садакьа гунин адет хкудун патал собранидал ва анал алайбуру чпин хизанра гъавур­да­ твадай кlвалах тухвана. Лагьана кlанда, и кlвалах акьван регьятдиз кьиле физвач. Ятlани, нетижаяр писбур туш. Идалайни гъейри, собранидал кьабулай къарардин бинедаллаз  микрорайонда яшамиш жезвай гьар са хизанди йиса са агъзур манат пул фондуниз рекье твазва.

Шаз мергьяматлувилин фондуниз кьилдин ксари ва рагьметдиз фейибурун багърийри гайи пулунин кьадар 356 агъзурни 500 манатдив  агакьна. Идакай 213 агъзур манат садакьайринди, амайди хуьруьнвийрини карчийри гайи куьмекдинди я.

Гьа икl, чна кlватlай такьатрихъ  микрорайондин са-са месэла гьялиз башламишна.

Кьилди къачуртlа, са шумуд суб­бот­ник тухвана. Сурарал агъадихъ галай кlва­­лахар авуна: жугъунар ремонт­на, къуйдал кьур эцигна, аниз эквер тух­в­а­на, кьейиди кучукдайла герек къвезвай алатар авай махсус кlвал ремонтна, зирзибил кIватIна, су­рарин къерехра авай тарариз яд гудай хвал михьна. КамАЗ-дин са рейс къум ва са рейс чиргъ, бетондин 100 плитка гъана. Муькуь субботникдиз жемятди дигидай яд гузвай къанав михьна, 68 агъзур манатдин  500 мл-дин асбестдин 18 турба къачуна,  абур атlана ла­зим чкайрик кутуна. Первомайский куьчеда авай къанав экскаватордалди михьна, аниз бетондин латар вегьенва. Советский куьчеда авай газдин линиядин турбайриз шир яна, “консервиярдай заводдилай” микрорайондин школадал кьван авай ЛЭП-дин даяхрал йифен эквер эцигнава­.

За винидихъ лагьайвал, чlехи хьанвай хуьруьз трансформатордин къуват бес тежез, эквер мукьвал-мукьвал хкуд­з­авай. И месэла гьялун патал чна халкь­дин куьмекдалди кlватlнавай пулунихъ 400 квт-дин трансформатор къа­чуна. Ам чаз 150 агъзур манатдай акъвазна. Тран­сформатор кутаз ва гьак­l­­­­­ни са жерге ма­са месэлаяр гьялиз чаз Белиж поселокдин кьил Рамиз Гьабибулаева жедай вири куьмекар гузва. Алай вахтунда Первомайский куьчеда цlийи трансформатор эцигна, кутунва, экверин месэладини агьалияр гъари­кIар­­замач.

Хуьруьн ким эцигдай чилин месэлани регьятдиз гьял хьана. Жамал Та­гъи­ева, рагьметдиз фенвай вичин дах Мисриханан тlвар эбеди авун яз, жемятдиз вичин хсуси 8 сотых чил ким эци­гун патал пишкешна.

Хуьруьн активдихъ, имамдихъ галаз меслятдал атанвайвал, гележегда агъа­дихъ галай кlвалахар кьиле тухудай фи­кир ава: садакьаяр гунин, пуд йи­ферал атайбурув пакетар вухкунин куьгьне адетар хкудунин мураддалди хуьруьнвийрин арада таблигъат тухун, цlийи трансформатор эцигнавай рекьин­ кьве патани, къелемар цана, аллея кутун, сурарин жугъун профнастилдалди­ эвез авун ва масабур.

Хуьруьн месэлаяр гьялиз аквадай хьтин  куьмекар гузвай хуьруьнвияр тир Сейфулагь Исакьован, Рамиз Гьабибулаеван, Айдемир Агь­медован, Жамал Тагъиеван, Ра­дик Ра­мазанован, Бинья­мудин Асла­нован, Му­рад Алимегьамедован, Радик ва Рам­зес Апаеврин, Анвер Гьажимурадован, Марат Меликован, Рамазан Рамазанован, Тlижиб Агьмедован, Мегьамед Набиеван, За­мир­ Акимован, Агъаширин ва Адаширин Ра­­мазановрин, Мегьамед Ибрагьи­мо­ван, Сабир Агьмадован хизанрин тlва­рар кьаз (газетдин чина виридан тlва­рар кьаз жедач), вири субботникра активдаказ иш­тиракзавай саки гьар са хуь­руьн­ви-дизни сагърай лугьуз­ кlан­за­ва.

Хуьруьз талукь вири месэлаяр кварталда садра тухузвай жемятдин собранидал веревирдзава, анал  агъса­къал­рин советдин председателди тухвай кlвалахдин гьахъ-гьисаб ийизва. Собранида иштиракиз  поселокдин администрациядин кьилиз, школайрин директорриз, мискlиндин имамдиз, поселокдин Собранидин депутатриз, общественный тешкилатрин векилриз теклифзава.

Гьахъ-гьисабдин нубатдин собранидал агъсакъалрин советди тухванвай ва тухузвай кlвалахдиз анал рахай и цlа­­ра­рин авторди, Рамиз Гьабибулаева, агъсакъалар тир Бейдуллагь Исакьова, Гьабибуллагь Гьабибулаева, школадин директор Радик Апаева ва масабуру хъсан къимет гана.

Микрорайондин къуншидал яшамиш жезвай Шихбуба Алиева чпин куьчеда яшамиш жезвай агьалийри чебни “Хпеж” микрорайондик кутун тlалабза­вайдакай ва микрорайон аваданламишун патал аквадай хьтин пай кутаз гьазур тирдакай лагьана.

Къагьриман  Ибрагьимов