ЧIехи Гъалибвилин 72 йис тамам жезвай суварин вилик Дербент шегьердин женгинин Баркаллувилин паркуна авай Эбеди цlун ва “Гъам чlугвазвай дидедин” монументдин патав Вирироссиядин ватанпересвилин мярекатрин сергьятра аваз шегьердин “Георгиевский лентинин” акция башламиш хьана.
6-нумрадин СОШ-да кlелзавай Рустам Имрановани Амина Османовади шегьердин кьил Малик Баглиевав ва администрациядин работникрив игитвилин ва аскервилин жуьрэтлувилин лишан тир “Георгиевский лентер” вугана.
— Чи шегьердин школайра кlелзавай аялри ва жегьилри “Зи рикlел алама, за дамахзава” лишандик кваз” Георгиевский лентинин” акцияда иштирак авунал зун пара шад я, — лагьана М. Баглиева. — Алатай йисарин вакъиаяр рикIел хуьн ва абурукай къвезмай несилризни суьгьбетун чи пак буржи я.
Мярекатда Дербент, Дагъустандин Огни шегьеррин ва Дербент райондин военный комиссар Адиль Къулиева, шегьердин образованидин управленидин начальник Вадим Къулиева, администрациядин работникри, “Юнармиядин” отрядри, школьникри, агьалийри иштиракна.
Акция шегьердин куьчейра “Георгиевский лентер” паюналди давам хьана.
Гьа ихьтин акция Белиж поселокдани башламиш хьана.
И мярекатдин тешкилатчияр Дербент райондин жегьилрин ва туризмдин крарай отдел ва райондин жегьилрин Совет тир.
Акцияда райондин жегьилрин Советдин председатель Вероника Мирзоевади, жегьилрин ва туризмдин крарай отделдин работникри, поселокдин 2-нумрадин СОШ-дин директор Къурбан Алиева, и школадин “Юнармиядин” отрядди ва аялри иштиракна.
Аялри, куьчедай физвай машинар акъвазариз, шоферрив ва физвай инсанрив, гьакlни поселокдин администрациядин работникрив “Георгиевский лентер” вугана.
“Георгиевский лентинин” акция 9-Майдалди давам жеда.
Къагьриман Ибрагьимов
