И йикъара Мегьарамдхуьруьн райондин Къуюстанрин мектебда «Хайи чIалан лап хъсан муаллим-2019» конкурсдин муниципальный пай кьиле фена. Идакай «Лезги газетдиз» райондин администрациядин пресс-къуллугъди хабар гузва. 

«Райондин методический кабинет» МКУ-ди тешкилай конкурсда цIинин йисуз райондин вад муаллимди иштиракна.

Конкурсдин макьсад яратмишунин тегьерда кIвалахзавай хайи чIаланни эдебиятдин муаллимар винел акъудун, абуруз куьмек гун, образованида милли чIаларин роль хкажун я.

Муниципальный пай «Заочный», «Тарс» ва «Образовательный проект» паярикай ибарат хьана. И пуд паюнай конкурсдин иштиракчийри чпин алакьунар, тежриба, алай аямдин истемишунрив кьур кIвалах къалурна.

Нетижада сад лагьай чкадиз Гъепцегьрин мектебдин лезги чIалан муаллим Румина Абдулгьалимова лайихлу хьана. Кьвед лагьай чка Советский хуьруьн мектебдин муаллим Дилара Юсуповади ва пуд лагьай чка Кчунрин мектебдин муаллим Фаина Рагьмановади кьуна.

Муниципальный паюна гъалиб хьайи Румина Абдулгьалимовади Мегьарамдхуьруьн райондин патай Махачкъалада кьиле фидай республикадин паюнани иштиракда.

«Лезги газет»