Ахцегь райондай тир кьве ансамбль «Халкьдин коллектив» тIварцIиз лайихлу хьана. Идакай  милли «ЛезгиЯр»порталди хабар гузва.

РД-дин культурадин министерстводин къарардал асаслу яз, 5-февралдиз Махачкъалада «Халкьдин коллектив» тIвар тестикьарун патал халкьдин коллективриз килигунин мярекат кьиле фена.

Урус театрдин гъвечIи залда кьиле фейи мярекатда иштиракун патал Ахцегь райондай ашукьрин «Шарвили» халкьдин ансамблдиз ва халкьдин алатрин ансамблдиз теклифнавай.

«Шарвили» ансамблдин руководитель Саид Эскерханова ва халкьдин алатрин ансамблдин руководитель Исамедин Агьмедова мярекатда иштиракун патал виликамаз гьазурвилер акунвай. Абуру тамашачияр лезги халкьдин машгьур манийралди ва макьамралди гьейранарна.

Жюридин дестеди ахцегьвийрин алакьунриз чIехи къимет гана. Кьве ансамблни «халкьдин» лагьай тIварариз лайихлу хьана ва талукь тир сертификатар абуруз 26-февралдиз гуда.

«Лезги газет»