Сулейман-Стальский райондин хуьрера яшайишдин, коммунальный кIеви амукьаяр (ТКО), зирзибил кIватI хъувун, абур тайинарнавай махсус чкадал  тухун патал еке кIвалах тешкилнава. Уьлкведин маса субъектра ва муниципалитетра хьиз, чи райондани ТКО кIватI хъувунин цIийи къайда кардик акатзава, яваш-яваш ам виринра ишлемишда. Гьелбетда, цIийи къайда — им вири патарихъай кIвалах маса жуьреда тешкилда лагьай чIал я. Халкь тамамвилелди адан гъавурдани авач.

КIеви амукьаяр кIватI хъувунин месэладиз талукь яз ад­министрацияда январдин вацра райондин кьил Н.Абдулмута­либован иштираквал аваз кьве совещание кьиле фена. Сифте­гьан совещанидал “Касумкентсервис” ООО-дин директор Гъа­либ Фатагьова ТКО кIватI хъувунин цIийи къайда­дикай, адан кьетIенвилерикай гегьенш рахунар авуна. Ада къейд авурвал, 2019-йисан 1-январдилай ТКО тухун яша­йиш­дин къуллугърин жуьредикай хкудда, ам комму­наль­ный­ къул­лугъ­ жеда. Алай вахтунда мулкар михьи авун па­тал цIийи къай­даяр тайинарнава. Россиядин Федерация­да акъуднавай ­законрин истемишунар уьмуьрдиз кечирмишунин сергьят­ра аваз коммунальный кIеви амукьаяр кIватIунин, улакьра аваз тухунин, гьялунин, сортариз чара, терг авунин кIвалахар кьилиз акъудун патал региондин оператор тайин хьанва. Сулейман-Стальский районда региондин оператор “Экологи-Ка” ООО я.

2-совещанидин кIвалахда райондин собранидин председатель Штибег Мегьамедханова, “Экологи-Ка” ООО-дин руководитель Альберт Черникова, экологиядин ва тIебиат­дикай менфят къачунин кьиблепатан районрин уртах управленидин руководителдин заместитель Фикрет Магьмудова, Гъалиб Фатахова, са жерге хуьрерин администрацийрин кьилери иштиракна.

Совещанидал Альберт Черникова коммунальный кIеви амукьаяр кIватI хъувунин, тухунин цIийи къайдадикай лагьана. ЦIийи къайда гуьнгуьна гьатайдалай гуьгъуьниз, сор­та­риз чара тавуна, ТКО полигондал тухунал къадагъа эцигда. “Экологи-Ка” компанияди гьар юкъуз сортариз чара тавунвай коммунальный кIеви амукьаяр хуьруьн майишатдин чилерал алай официальный тушир полигондал тухуда­.

— Гьелбетда, еке хаталувал ва чIехи жавабдарвал ава, — лагьана Альберт Черникова. – Хуьрерин поселенийрин администрацийрин кьилерин ва жавабдар ксарин куьмек галачиз гъиле кьунвай кIвалах кьилиз акъудиз хьун мумкин туш. Чи кIвалахдин асул метлеб агьалийриз хушбахтвал яратмишуникай ибарат я. Халкьдивай къачур пулунин такьатар хаммал гьялдай заводар эцигунин, техника къачунин, кIвалахзавайбуруз мажибар гунин рекьериз серфда. Гьелбетда, сифте кьилерай чна чкайрал арадал атанвай кIвалахдин къайда чIурдач, амма яваш-яваш цIийи къайдадал элячIда, дегишвилер фикирда кьада.

Совещанидал алай месэладай чпин фикирар райадминистрациядин кьилин 1-заместитель Лацис Оружева, Штибег Мегьамедханова, общественный палатадин председатель Алимет Мейланова, Фикрет Магьмудова, Сулейман-Стальский районда региондин оператордин векил Рамиз Бабаева, райондин прокурордин куьмекчи Ямудин Исмаилова ва са жерге маса пешекаррини векилри лагьана ва теклифар гана. Абур нормативно-правовой база таъминарунин, агьалийри коммунальный къуллугърай пулар гунин, халкьдиз ихтияррин  жигьетдай куьмекунин ва маса месэлайрал гегьеншдиз акъвазна.

— КIвалах дуьз тешкилнавайвиляй, районда вичихъ лицензия авай “Касумкентсервис” ООО хьтин организация кардик квайвиляй чи район “пилотный” яз тайинарнава, — лагьана­ Н.Абдулмуталибова. — “Касумкентсервисдихъ” коммунальный кIеви амукьаяр кIватIунин рекьяй техникани, тежрибани, кIвалахдин къайдада гьатнавай къурулушни ава. ЦIийи къайдадал элячIунихъ галаз алакъалу яз чаз агьалийрин патай наразивилер хьана кIанзавач. ТIимил къазанжи­ къачузвай гьар са касдин кьилиз ТКО кIватIунай гьар вацра 37 манатдилай 50 манатдал къведалди пул къачун зарар я. Амма гьар са касдиз чир хьана кIанда хьи, Сулейман-Стальский райондин мулкунал федеральный закон кьилиз акъудда.

Н.Абдулмуталибова хуьрерин администрацийрин кьилерал, жавабдар къурулушрал региондин оператордихъ галаз санал халкьдин арада гъавурда тунин кIвалах тухун тапшурмишна.

Хазран Кьасумов