Мегьарамдхуьруьн райондин АПК-дин кIвенкIвечи, райондин чилериз ва абур ишлемишуниз талукь отделдин пешекар, МР-дин Афгъанистандин ветеранрин Союздин председатель Гьабиддин Алиев РД-дин Гьукуматдин Гьуьрметдин грамотадалди къейдна. Идакай «Лезги газетдиз» райондин администрациядин пресс-къуллугъди хабар гузва.
Хуьруьн майишатдин кIвалахдай авунвай лайихлувилерай ва гзаф йисарин гьакъисагъ зегьметдай РД-дин Гьукуматдин председатель Артем Здунова лайихлубурув шабагьар вахкунин шад мярекат РД-дин хуьруьн майишатдин ва недай суьрсетдин министерстводин коллегиядин заседанидин сергьятра аваз, 31-январдиз кьиле фена. Ана Мегьарамдхуьруьн райондин хуьруьн майишатдин отделдин директор Фейруддин Рагьимхановани иштиракна.
Мярекатдал республикадин премьер-министрди кар алай месэлаяр ачухдаказ веревирд авунин ва абур гьялдай рекьер жагъурунин метлеблувал къейдна. Ада малумарайвал, хуьрерин мулкарин гьалар чирун, анра инфраструктурадин объектар эцигун, кIвалахдай цIийи чкаяр арадал гъун важиблу я.
Хуьруьн майишатдин ва недай суьрсетдин министерстводин кIвалахдин нетижайрикай ва 2019-йисуз АПК-дин хел вилик тухуникай министр Абдулмуслим Абдулмуслимова ихтилатна.
Гуьгъуьнлай Артем Здунова АПК-дин кIвенкIвечияр шабагьралди къейдна.
«Лезги газет»
