И йикъара “Лезги газетдин” редакциядин электронный почтадиз Мегьарамдхуьруьн райондай (хуьр къалурнавач) тир Загьиров Муслим Шабановичалай агъадихъ галай манадин чар атана:
“Гьуьрметлу “Лезги газетдин” редакция!
Зун квез и чар кхьиниз мажбур хьанва. Зи 87 йис я. Алай йисан 3-нумрадин “Лезги газетда” пенсияр хкажуникай чапнавай макъала за дикъетдивди кIелна.
Зун гъавурда акьурвал, 2019-йисан 1-январдилай 80 йисалай алатнавай пенсионерриз гудай пулунин кьадар 2 сеферда хкажнава, яни адан кьадар 10668 манат хьанва. Вучиз ятIани заз хкажнавай пулунин кьадар 2400 манат я. И кардин патахъай зун Мегьарамдхуьруьн райондин пенсийрин фондуниз фена.. Ана заз ихьтин жаваб гана: “Зун а пул гузвай ксарик акатзавач. Ам гила 80 йис тамам хьанвай пенсионерриз гузва”. Идан гъавурда гьикI гьатун лазим я? Куьне жаваб це, заз алава пул къвезвани, къвезвачни?»
Редакциядин патай.
Гьуьрметлу Муслим Шабанович!
Куьне дикъетдивди кIелнавай малуматда хабар ганвайвал, алай йисан 1-январдилай 80 йисалай алатнавай пенсионеррин фиксированный (яни гьукуматди гьар вацра гун заминламишнавай тайин кьадар) пенсиядин кьадар кьве сеферда артухарнава. 2019-йисалай лагьайтIа, страховой пенсиядик кваз гьукуматди гьар вацра гун заминламишнавай пулунин тайин кьадар 5 300 манат хьанва. Им лагьай чIал я, 80 йис тамам хьайи пенсионерриз гузвай и пулунин кьадар алай йисан сад лагьай вацралай 400 манатдин артух, яни (4900 манатдин чкадал) 5300 манат хьанва. Мадни хълагьин: и пул анжах 80 йис тамам хьайи йикъалай артухарзава. Гуьгъуьнин йисарани, артухарнавай кьадарда аваз, ам, яни “яшлувилин пенсия”, 80 йис хьанвай ва яшар идалай алатнавай вири пенсионерриз гузва. Амайбуруз — ваъ.
“Лезги газетдин” 3-нумрада чапнавай малуматдани хабар ганвайвал, фиксированный пулунин кьадар кьве сеферда артухарун “Страховой пенсийрин гьакъиндай” 2003-йисуз кьабулай законда къалурнава. Гьа вахтунилай инихъ къуватда ава.
Гьуьрметлу Муслим Шабанович, кьилди Куь дуьшуьшдиз талукь яз мадни лугьуз кIанзава: и пул виликдай (яни куь яшар 80-дав агакьай йикъалай) квезни ганва ва гилани гузва (амма а чIавуз а пулунин кьадар тахминан 4 000 манат тир). Куьне а пул къачуз 7 йисалай (87 йис хьуниз килигна) виниз я. Къенин юкъуз Квез гьукуматди гузвай 18 022 манат пенсиядик и пулни ква. Гила квелай “жегьилбурувни” гьукуматдин патай ихьтин куьмек агакьнава. Гьаниз килигна Мегьарамдхуьруьн райондин пенсийрин фондунай Квез ганвай жаваб дуьзди я.
Амма Куьн патал шад хабарни авачиз туш. Алай йисан 1-февралдилай ЕДВ-дин кьадар артухарзава. Алай вахтунда Куьне, 2-группадин инвалид яз, къачузвай и пулунин кьадар 2590 манат ятIа, 1-февралдилай адан кьадар 2701 манат жеда.
