1920-йисар. Гзаф итимар кьил хуьз Бакудиз физвай.
КIиридайни гзафбуру Бакудин нафтIадин мяденра кIвалахзавай.
Абурукай сад Къурбанов Азиз Къурбанович тир.
Зегьметдал рикI алай ва хци зигъин авай Азизакай буругъдин мастер-нефтяник хьана. Касди вичин веледрин гележегдикайни фикирзавай. Хва Мегьамед гимназиядик ва руш Мафизат дишегьлийрин гимназиядик кутуна. Абуру гимназияр куьтягьна. Мегьамеда гуьгъуьнлай Азербайжандин сводный военный школада ва ахпа Балаханадин реальный училищеда кIелна.
Къурбанов Азиз вичин хизанни галаз хуьруьз хтана.1924-йисуз Къурбанов Мегьамед КIирийрин хуьре потребсоюздин счетоводвиле кIвалахал акъвазна. Вах Мафизата школада урус чIалан тарсар гуз хьана. Абур кIелна хтанвай хуьруьнвийрикай сифтегьанбур тир. Къурбанов Мегьамедаз 4 чIал чидай: азербайжан, урус, фарс ва немс.1929-йисуз ада Кьурагьрин РИК-дин секретарь ва 1930-йисуз Кьурагь райфинотделда бухгалтер яз кIвалахна. 1937-йисуз ам ДАССР-дин финансрин министерствода бухгалтер-ревизорвиле тайинарна.
М.Къурбанован туькIвей хизанда 6 аял авай: Сервет, Шевкет, Тимучин, Физилат, Наида, Ферида.
1941-йисуз хабарсуз фашистрин Германияди дяве башламишна. Къурбанов Мегьамедаз хушуналди дяведиз физ кIан хьана, амма военкоматдиз фейила, ам Махачкъаладин пехотный училищедин старшинадин куьмекчивиле тайинарна. Ахпа фронтдиз фена.
1942-йисуз Мегьамедан хиве жавабдар везифаяр туна. Гьа йисуз хер хьайи ам госпиталдиз аватна. Сагъ хъхьайла, адал комендантский взводдин командирвилин къуллугъ ихтибарна. Адан кьегьалвилер Яру Гъед ордендалди, “Будапешт азад авунай” медалдалди къейдна.
Дяведай хтайдалай кьулухъ бухгалтервиле кIвалахай ветеран 1959-йисуз рагьметдиз фена.
Фарида Керимханова
