Инсанри масадан дердидикай хабар кьун, куьмек герекдаз куьмек гуз алакьун, зи гьисабрай, еке бахтлувал я. Куьмек герек ксар зални жуван уьмуьрда пара гьалтна. Эцигунрин устIар яз, хейлин ксариз, иллаки ялгъузризни яшлубуруз, яратмишунрал машгъулбуруз (шаирриз, художникриз, музыкантриз) абурун кIвал-югъ туькIуьрдайла, дачайра мумкинвилер хъсанардайла куьмекар гуз алакьай ксари гилани “Чан сагърай ви, Бутай”, лугьузва.

Гила кьисметди зун республикадин центральный больницадин ивидин азаррин (гематологиядин)  отделенидиз акъуднава. Ана зун, дугъриданни, азарлудан гъавурда фад акьадай, адаз рикIин сидкьидай куьмек гуз алахъзавай коллективдал гьалтнава. Духтурар тир бубани хва Мурад ва Мугьаммед Закарияевар, кьилин сестра  Салимат  Агъаризаевна  Агъасиева  чпин къилихралдини, чирвилералдини, къайгъударвилелдини и отделенидиз кьисметди акъуднавайбуруз хатурлу ва мукьва я. Салимат Агъаризаевнади вич хайиди тир Докъузпара райондин тIварцIел баркалла гъизва. Отделенида къулайвал, къайда, къенивал хьун духтуррилайни гзаф кьилин сестрадилай, адахъ галаз санал кIвалахзавай вири медработникрилай аслу тирдал шак алач. Гьавиляй Салимат Агъаризаевнадиз, азарлуйри хьиз, кIва­лах­дин рекьяй юлдашрини, духтуррини гьуьрметзава. РД-дин здравоохраненидин минис­терстводи адаз ганвай Гьуьрметдин грамотади, чухсагъулдин чарари а кар субутзава.

Салимата и больницада 1984-йисалай, яни Дербентдин медучилище акьалтIарна, Махачкъаладиз  атайдалай инихъ кIвалах­за­ва. Гила 35 йис я, гьа са чкадал гьакъисагъ­вилелди зегьмет чIугваз.

И йикъара адан 65 йис тамам жезва. Хъсан юбилей я. Чна чи рушаз, чи духтурдиз, къайгъудар сестрадиз, балайрин дидедиз кьве вакъиани рикIин сидкьидай мубаракзава. Шаир Мерд Алиди лагьайвал,

Сагъламвал хуьз инсанрин,

Къуват гурай Квез.

Гьуьрметар чи кьакьанрин

Савкьат хьурай Квез.

 

Къаракуьре, Усугъчай,

Миграгъ гала Квехъ.

Эренлардин паквал гвай

Чи рагъ гала Квехъ.

 

Йисар фида, вацIар хьиз,

Алудиз яцIар.

Куь рехъ, Рачи-рачар хьиз,

Гуз жеда цIарцIар.

 

Къуй икI хьурай, чир тежез

Яшарин гьич сан.

Ваз сагъвал гуй, мерд хъуьрез,

Играми инсан. Амин…

Бутай Бутаев, карчи