Чна виликамаз хабар гайивал, 24-27-январдиз Красноярскда Иван Ярыгинан Гран-При патал азаддаказ кьуршахар кьунай международный турнир кьиле фена. Ана дагъустанвияр тир 21 спортсменди заланвилин 10 категориядай чпин алакьунар къалурна.
Шадвилелди а кардикай хабар гуз кIанзава хьи, Дагъустандин хкянавай командади алатай йисуз къазанмишай виниз тир нетижа цIини тикрар хъувуна. Дагъустанвияр, къизилдин медалар къачуз, 7 сеферда пьедесталдал хкаж хьана. Абурун арада Европадин чемпион Даурен Куругълиевни (86 кг) авай. Гила чи ватандаш и турнирда кьвед лагьай сеферда 1-чкадиз лайихлу хьанва. Дагъустандин хкянавай командадин “киседиз” къизилдин медалар гъайибурук мадни ква: Мегьамедрасул Идрисов (61 кг), Агьмед Чакаев (65 кг), Мегьамедрасул Газимегьамедов (70 кг), Агьмед Гьажимегьамедов (79 кг), Мегьамед Къурбанов (92 кг) ва Шамил Мусаев (97 кг).
Дагъустанви спортсменрикай кьведа-Абасгьажи Мегьамедова (57 кг) ва Мегьамед Рамазанова (79 кг) турнирда гимишдин медалар къазанмишна.
Чаз гуьгъуьнлай чир хьайивал, Иван Ярыгинан Гран-При патал турнирда чи мад са ватандашди — Рамазан Ферзалиевани иштиракна. Ам 3-чкадиз лайихлу хьана. Буьруьнждин медалар къачурбурун арада Гьажимурад Рашидов (65 кг), Разамбег Жамалов (70 кг) ва Мегьамед Къурбаналиевни (74 кг) ава.
Даурен Куругълиеван гъалибвал вилив хуьзвайбуруз виридалайни четин хьана. ГьикI хьи, заланвилин 4 категориядай (74, 86, 92 ва 97 кг-дал къведалди) спортсменри, абурук кваз чи ватандашдини, турнирдин эхиримжи юкъуз финалдин бягьсера гьасиррал чпин гьунарар къалурун герек тир. Дауреналай нубатдин сеферда чи халкьдин руьгь хкажиз алакьна. (Лугьун лазим я хьи, турнирдин эхиримжи юкъуз чи командадин “киседиз” мад пуд “къизил” атана). Малум хьайивал, финалда Д.Куругълиев Туьркиядай тир Фатих Эрдинахъ галаз “гуьруьшмиш хьана”. Бягьс вахт куьтягь жедалди (досрочно) 12:1 гьисабдалди акьалтIарна. Гъалибвал къазанмишунин рекье Кубадай тир Артуро Торрес (11:0) ва Монголиядай тир Уйтумен Оргодолни (10:0) чи ватандашдиз кумукьна. И бягьсерни вахт куьтягь жедалди акьалтIарнай.
Чна Дагъустандин хкянавай командадиз, Даурен Куругълиеваз ва Рамазан Ферзалиевазни, нубатдин гъалибвал мубаракзава. Абур апрелдиз кьиле фидай Европадин чемпионатдани гъалиб хьун чи мурад я.
Рагнеда Рамалданова
