Алатай гьафтеда Дербент шегьердин агьалияр Дагъустан Республикадин государственный яшайишдин кIвалерин кьилин инспектор Али Жабраилова кьабулна. И гуьруьшда гьакI РД-дин Халкьдин­ Собранидин депутатри, РД-дин Общественный палатадин членри ва халкьдин фронтдин  региональный исполкомдин векилри иштиракна.

Шегьердин агьали, сад лагьай группадин инвалид Маржанат Рус­тамовади вич 1996-йисалай яшайишдин кIвалерин шартIар хъсанару­низ талукь нубатда авайдакай арза авуна. Вичин нубат агакьай­ла, ше­гьердин талукь идаради, документрик са гьихьтин ятIани чарар-цIа­­рар квач лугьуз, кIвалер ганач. Алай вахтунда набут дишегьли на­чагъ хцихъ галаз кирида кьунвай ва усал шартIарин кIвале яшамиш жезва.

И месэладин гьакъиндай шегьердин администрациядин учетдин, кIвалер чара ва приватизация авунин рекьяй отделдин начальник Артур Ражабова алава хъувурвал, Рустамовадин документар са шумудра РД-дин эцигунрин ва архитектурадин министерстводиз­ ­ рекье тунай. Анай хтай чарара кхьенвайвал, М.Рустамовадин начагъвал сифте нубатда кIвалер гудайбурук акатзавач. Кар ана авай хьи, адан документра эцигнавай диагнозар жуьреба-жуьребур тир.

Али Жабраилова А.Ражабовал дишегьли яшамиш жезвай кIва-лерин гьакъиндай акт туькIуьрун, герек вири документар гьазурун ва абур РД-дин Халкьдин Собранидиз рекье тун тапшурмишна. Халкь­дин Собранидин депутатри чпин гьисабдай РД-дин эцигунрин ва архитектурадин министерстводиз М.Рустамовадиз кIвалер чара авунин гьакъиндай махсус чар кхьидайди хиве кьуна.

Солмаз Балаевади вичин чилин участок кадастровый учетдал эцигунин патахъай куьмек тIалабна, Мурад Гьажиева вичел газ иш­ле­мишу­най  тапан, авачир буржар илитIнавайдакай шикаятна. Кьилин ин­спектордин патав гьакI яшайишдин кIвалер эцигиз гъиле кьунвай компанийри алдатмишнавай агьалиярни атана.

Санлай А.Жабраилова 40 кас кьабулна, виридан дердийрихъ яб акална, абуруз тайин жавабар гана.

Агьалияр кьабулзавай гуьруьшда гьакI шегьердин администрациядин кьилин заместителар Евгений Бабаева, Брем Бремова, ЖКХ-дин управленидин начальник Артур Гьамзатова, чилерин ва  эменнидин алакъайрин управленидин руководитель Заур Эминова иштиракна.

Абад Азадов