ЦIи 1-Майдин сувар уьлкведин вири регионра гурлудаказ къейдна. Чи республикани и жигьетдай кьулухъ галамукьнач. Махачкъалада, Урус госдрамтеатрдин вилик квай майдандал зегьметчийрин суварриз талукь митинг кьиле фена. Пайдахар, жуьреба-жуьре рангарин шарар гъилера авай инсанрив “Ислягьвал, зегьмет, май!”, “Зегьметчийриз — лайихлу мажиб!”, “Жегьилриз — кутугай кIвалах!”, “Дагъустанвийриз — лап хъсан яшайиш!” гафар кхьенвай транспарантарни гвай. Ана Да­гъустан Республикадин Кьил Р. бдулатиповани иштиракна.

КIватI хьанвай виридаз сувар тебрик авуналди, Дагъустандин профсоюзрин организацийрин Союздин председатель Абдулла Мегьамедова вири зегьметчияр сад хьунин, абуру рейсадвал къалурунин важиблувал къейдна.

— Сад лагьай Май чи макьсадрин, истемишунрин садвал, рейсадвал къалурзавай сувар я, — лагьана ада. — Йисалай-суз и суваррин метлеб еке, аник иштиракзавай агьа­лийрин кьадар гзаф жезва. ИкI хьуник республикадин гьукуматдини, Махачкъала шегьердин администрациядини, политический партийрини, общественный организацийри ва профсоюзрини чпин пай кутазва. Вахтар четинбур я. Чарасуз гьялна кIан­за­вай месэлаярни тIимил туш. Дагъус­тандин агьалийрин мажибар, уьлкведин маса регионрив гекъигайла, гъвечIибур я. Чина хуьруьн майишатда кIвалахзавай ксари виридалайни тIимил мажиб къачузва. Бюджетдин къурулушда кеспидик квай гзафбурун вацран мажибарни 10-11 агъзур манатдилай виниз алатзавач. Заз инанмишвал ийиз кIанзава, республикадин кьиле акъвазнавай ксарин, депутатрин куьмекдалди чна и месэлада хъсанвилихъ дегишвилер твада.

Россиядин  халкьдин фронтдин Да­гъустандин региондин штабдин сопред­седатель Мухтар Оздеаджиева яшлу ва жегьил несилрин арада менфятлу ала­къаяр хуьникай, гегьеншаруникай, хъсан адетриз шегьре рехъ гуникай ихтилатна. Ада къейд авурвал, исятда чи уьлкведиз  ислягьвал хуьнин, ­мягькемарунин вири­далайни гзаф игьтияж ава. Анжах ислягь уьмуьрди менфятлу, бегьерлу кардал машгъул жедай мумкинвал яратмишзава. Чна гьеле къени хийир къачузвай дев­летар ислягь чIавуз яшлу несилдин гьакъисагъ зегьметди арадал гъайибур я. Гьайиф хьи, къе жегьилрин арада зегьмет чIу­гуникай кьил къакъудзавайбур артух жезва. ИкI тахьун патал М.Оздеаджиева яш­лу­ не­силди жаванриз, жегьилриз ахлакьдин, ма­рифатдин, зегьметдиз гьуьрмет аву­нин ­рекьяйни чешне къалурун, тербия гун герек тирдакай лагьана.

РД-дин Халкьдин Собранидин депутат, республикадин здравоохраненидин ра­ботникрин профсоюздин комитетдин ­рескомдин председатель Зумруд Бучаевади  Май­дин  сувар  вири  зегьметчийринди тирди, гьар сада уьлкведин ва акьалтзавай несилдин гележег патал зегьмет чIуг­ваз­­вайди, девлетар арадал гъизвайди къейдна.

— Чун икI кIватI хьуни, Сад лагьай Майдин сувар тешкиллувилелди тухуни чаз па­ка­дин йикъахъ инанмишвал, уьлкве абад, агьалийрин яшайиш хъсан жедайдахъ умудлувал гузва, — лагьана З.Бучаевади.

Митингдал мадни жуьреба-жуьре пар­тийрин, организацийрин векилар рахана ва абуру уьлкведин абадвал, къудратлувал, халкьарин асайишвал, мублагьвал обществодин вири къуватар, къатар сад хьунилай аслу тирдакай лагьана.

Митингдин иштиракчийри зегьметчи инсанрин ихтиярар хуьниз, абур кIвалах­дал­ди, кутугай мажибдалди таъминаруниз талукьарнавай къарар кьабулна.

Республикадин ва шегьердин культурадин, искусстводин идарайрин гьевескарри, устадри суварин концерт гана.

Суварин шад мярекатар республикадин вири шегьерра ва районра кьиле фена.

Хийир  Эмиров