И йикъара Кьасумхуьрел цIийикIа туькIуьр хъувурдалай гуьгъуьниз СтIал Сулейманан парк — гъвечIи бахча (сквер) ачухунин шадвилин мярекат кьиле фена. Ам “Сулейман-Стальский муниципиальный районда 2018-2022-йисарин вахтунда алай аямдин шегьердин шартIар яратмишун» кар алай программадин “Кьасумхуьрел общественный мулкар яратмишун” проект уьмуьрдиз куьчуьрмишунин сергьятра аваз кьиле тухвана. Тадаракламишнавай мулкуник СтIал Сулейманан бюст, 200 квадратный метрдин майдан кьунвай ва аялар къугъвадай 10 тадарак эцигнавай майдан, экв гудай 34 прибор, 15 куьсруь, зирзибил вегьедай 15 ящик, хъвадай цин булах эцигнавай чка акатзава. Санлай къачурла, паркуни-бахчади саки 3000 квадратный метрдин майдан кьунва. Идакай 1100 квадратный метр гъвечIи майданар ва инсанар къекъведай (тротуардин плитка тунвай) рекьер я.
Парк-бахча къайдадиз гъун ва дуьзмишун патал, 504 кубический метрдив агакьна бегьерлу накьв гъана, жуьреба-жуьре жинсерин 50 къелем, гьамиша къацуз амукьдай кул-кусар цана.
Парк ачухунин мярекатда райондин кьил Нариман Абдулмуталибова, райондин собранидин председатель Штибег Мегьамедханова, райадминистрациядин ва хуьруьн векилри, Кьасумхуьруьн 1-нумрадин юкьван школадин муаллимри ва школьникри, агьалийри иштиракна.
— Парк-бахча, “Шегьердин къулай шартIар” программадин сергьятра аваз, райондин — 90, СтIал Сулейманан 150 йис тамам жезвай йисуз цIийикIа туькIуьр хъувурдалай гуьгъуьниз ачух хъувун — им важиблу вакъиа яз гьисабиз жеда, — лагьана Н.Абдулмуталибова. — Им РД-дин Кьилин программадай районда ачухзавай 4 лагьай объект я. И программа себеб яз, чаз райондин центрадин мулкар къайдадиз гъидай ва дуьзмишдай мумкинвал хьана. Умудлу я хьи, цIийи парк райондин агьалийри ва мугьманри ял ядай ва абурун рикI алай чкадиз элкъведа.
Мярекатдал райондин Общественный палатадин председатель Алимет Мейланов, райондин дишегьлийрин Советдин председатель Айишат Кьасумовани рахана.
Нариман Абдулмуталибова, Алимет Мейланова ва Айишат Кьасумовади яру лент атIана, парк-бахча ачухна.
Хазран Кьасумов
