Адет хьанвайвал, январдин эхирра Красноярскда азаддаказ кьуршахар кьунай Иван Ярыгинан Гран-при патал международный турнир кьиле фида. Спортдин и акъажунрин важиблувал а кардикай ибарат я хьи, адан нетижайриз килигна, дагъустанви спортсменрикай Европадин чемпионатда иштиракдай команда хкяда…
ЦIи республикадин спортсменри и важиблу турнирдиз Каспийскда, 5-Караман районда, Дагъустандин хкянавай командаяр патал цIийиз кардик акатнавай спортдин гьазурлухвилин региональный центрада (РЦСП) чпин устадвални тежриба хкажна. (Инаг виликдай футболдин “Анжи” клубдин кIелунринни вердишарунрин база тир).
Лугьун лазим я хьи, икьван чIавалди чи спорсменрихъ ихьтин къулай шартIар хьайиди туш. Виликан йисара абуру Махачкъаладин ЦОП-да (центр Олимпийской подготовки) устадвал хкажзавай. Анаг гъвечIи ва дар тирвиляй гзаф спортсменриз ана тренировкайра иштиракдай мумкинвал жезвачир.
Спортсменар Красноярскдиз рекье гьатдалди вилик Дагъустандин физический культурадин ва спортдин министр Мегьамед Мегьамедов, РД-дин Халкьдин Собранидин Председатель Хизри Шихсаидов “азадбуру” гьазурвилер аквазвай шартIарихъ галаз таниш хьана, спортсменривай тренировкайрин цIийи центр бегенмиш ятIа хабар кьуна, международный турнирда агалкьунар хьун алхишна.
Ина устадвал ва тежриба хкажзавайбурун тIварунихъай Дагъустандин хкянавай командадин кьилин тренер, РД-дин кьуршахар кьунин спортдин федерациядин президент Сажид Сажидова Мегьамед Мегьамедоваз ва Хизри Шихсаидоваз спортсменриз еке фикир гунай сагърай лагьана.
Гуьгъуьнлай мугьманар спорткомплексдин вири залриз ва патарив гвай чкайриз килигна.
* * *
Чаз малум хьайивал, Красноярксда кьиле фидай Иван Ярыгинан тIварунихъ галай международный турнирда Дагъустандин хкянавай командадик кваз чи ватандаш Даурен Куругълиевани 86 кг-дин заланвал авай спортсменрин арада вичин алакьунар къалурда. Винидихъ тIвар кьунвай спортдин центрада адани вичин устадвал хкажна. Ана яратмишнавай къулай шартIарилай виридахъ галаз чи ватандашдини разивал къалурна.
РикIел хкин: алатай йисуз и турнирда Дагъустандин хкянавай команда, къизилдин — 7 ва гимишдин 4 медаль къазанмишуналди, 1-чкадиз лайихлу хьанай.
Чаз цIини республикадин “азадбурухъ”, гьа гьисабдай яз Даурен Куругълиевахъни, нубатдин турнирда еке агалкьунар хьана кIанзава.
Рагнеда Рамалданова
