“Сулейман-Стальский район” муниципалитетдин кьил Нариман Абдулмуталибован председателвилик кваз кьиле фейи заседанида райондин депутатрин собранидин председатель Штибег Мегьамедханова, райадминистрациядин кьилин заместителри, управленийрин начальникри, общественный тешкилатрин ва массовый информациядин такьатрин векилри иштиракна.
Н.Абдулмуталибова къейд авурвал, алукьнавай 2019-йис район патал кьетIенди, лишанлуди я: цIи район арадал атана 90 йис тамам хьун къейдда. Идалайни гъейри, Дагъустандин халкьдин шаир, ХХ асирдин Гомер СтIал Сулейманан 150 йисни тамам жезва.
— Гьам райондин, гьамни СтIал Сулейманан юбилейриз чешнелудаказ гьазурвилер акун, юбилейрин мярекатар тухун — ибур чи вилик акъвазнавай важиблу месэлаяр я, — лагьана Н.Абдулмуталибова. — Чахъ ихьтин мярекатар тухудай хъсан тежрибани, хайи ерийрихъ рикI кузвай инсанарни ава. Гьавиляй завай инанмишвилелди лугьуз жеда хьи, юбилеяр чна виниз тир дережада аваз тешкилда. Тухудай мярекатрин планар тестикьарнава.
Райондин администрациядин аппаратдин руководитель Рамазан Абдулазизова къейд авурвал, юбилейдихъ галаз алакъалу яз хуьрерин куьчейриз райондин экономика мягькемаруник пай кутур, маса лайихлувилер авай ксарин тIварар гуда. Лайихлу инсанар РФ-дин ва РД-дин гьуьрметдин тIварар, гьукуматдин наградаяр гун патални къалурда. Меценатрихъ, къуллугърал алай районэгьлийрихъ, депутатрихъ галазни алакъаяр мягькемарда. Райондин сайтда, “Куьредин хабарар” газетда, Кьасумхуьруьн телевиденида махсус рубрикаяр ачухда, жуьреба-жуьре гуьруьшар тешкилда, конкурсар тухуда. Пландик культурадин, спортдин ва массовый гзаф маса мярекатарни тухун ква.
Райондин культурадин управленидин начальник, Дагъустандин халкьдин шаир Майрудин Бабаханова лагьайвал, СтIал Сулейманан 150 йисан юбилейдин мярекатар алай йисан 18-майдиз чIехи шаирдин ватанда — Агъа СтIалдал, райондин 90 йисан юбилейдин мярекатарни сентябрдин вацра Кьасумхуьрел тухуда. Райондин юбилейдиз талукьарнавай махсус ктаб акъудзава, ам саки гьазур хьанва.
— Райондин юбилейдин мярекатрин сергьятра аваз райцентрадал 16 поселенидин майданар тешкилда, — давамарна М.Бабаханова. — Анрал хуьруьн майишатдин ва лезги халкьдин милли хуьрекрин выставкаяр, концертрин программаяр, милли жуьрейрай спортдин акъажунар тешкилда.
Юбилейриз гьазурвилер акунин жигьетдай тухузвай кIвалахрикай райондин образованидин управленидин начальник Къачабег Аминова, информациядин агентстводин руководитель Жабраил Асланова, спортдин, физкультурадин, туризмдин ва жегьилрин крарай комитетдин директордин заместитель Муслим Селимова, общественный палатадин председатель Алимет Мейланова гегьенш рахунар авуна, теклифар гъана.
Заседанидин эхирдай Н.Абдулмуталибова къейдна: — Юбилейдихъ галаз алакъалу яз хуьрера, иллаки райцентрадал социальный, паркар, аллеяр, рекьерни куьчеяр цIийикIа туькIуьр хъувунин еке кIвалахар гъиле кьунва. Абур юбилейдин мярекатар тухудалди акьалтIарда. Михьивилер хуьниз иллаки екедаказ фикир гана кIанда. Чна райондин агьалийрилай, общественный тешкилатрилай теклифарни гуьзетзава. Райондин 90 йисан ва СтIал Сулейманан 150 йисан юбилеяр вини дережада аваз тухун — им гьар са районэгьлидин буржи хьун лазим я.
Хазран Кьасумов
