15-январдиз Дербент райондин администрациядин гьаятда образованидин идарайрин директоррив автобусар вахкунин мярекат шад гьалара кьиле фена.  Ана райондин кьил Мегьамед Желилова, райсобранидин председатель Мажмудин Семедова, райондин кьилин заместителри, школайрин директорри, аялри ва диде-бубайри иштиракна.

Дербент райондиз цIийи автобусар транспортдин такьатар деги­шаруниз талукь федеральный программадин сергьятра аваз ганва. Районда школайрин автобусар 2006-йисалай ишлемишзавай .12 школадин транспортдин та­кьатар дегишардай вахт фадлай алатнава.

Мярекат ачухай М. Желилова аялар чи гележег, абуруз гуьрчег ва бахтлу уьмуьрдин шартIар яратмишун буржарикай тирди къейдна. “Важиблу месэлайрикай сад аялар тухузвай рекьера хатасузвал хуьн я. ГОСТ-дин вири истемишунрив кьазвай цIийи автобусрин куьлегар квев вахкуз жедай мумкинвал хьунал зун къе гзаф шад я. Чаз цIийи техника гунай за Да­гъустан Рес­публи­кадин Гьукуматдиз сагърай лугьузва”.

Райондиз ахъайнавай автобусрин  куьлегар М.Желилова Хазардин, Геджухдин, Белиж по­се­локдин 4-нумрадин, Мамедкъаладин ва Агъа Жалгъандин школайрин директоррив вахкана.

Анал рахай Мамедкъала поселокдин школадин директор Зарема Ибрагьимовади аялриз ихьтин къулай автобусар гунай Гьукуматдин ва райондин кьиле авайбуруз сагърай лагьана.

Къагьриман Ибрагьимов