И йикъара Махачкъалада, “Михьи шегьер” лишандик кваз, са жерге куьчейра ва кIвалеринни идарайрин гьаятра къулайвилер тунин субботникар тешкилна.

Советский рай­­ондин Энгельсан тIва­рунихъ га­лай­ куьчеда, 25  ва 25 а-нумрайрин кIва­лерин ва 28-нумрадин юкьван школадин патарив гвай чкайра­ михьи­вилер тваз, кIва­лахзавайбурук са герендилай, ­республикадин Кьил Владимир Васильев галаз, са десте чIехи руководителар, тIебиат хуьнин ва экологиядин министр Н.Къарачаев, Махачкъаладин мэриядин векилар, депутатар ва масабур ахкахьна.

Михьивилер ва къулайвилер тунин кIвалахар вири уьлкведа санлай гьукуматдин дережада гуьзчивилик кутунва. Зирзибил кIватIун, шегьеррайни хуьрерай  акъудун ва абур махсус карханайра гьялун патал еке къуватар желбнава.

И сефердани, михьивилерин кIвалахрин къизгъинвал секин хьайила, республикадин Кьилиз чкадин агьалийрихъ галаз патавай рахадай ва дерди-гьал жузадай мумкинвални хьана. Хейлин ксари чпел ацалтзавай четинвилерикай лагьана. Республикадин руководителди талукь ведомствойрин векилриз тайин тапшуругъарни гана.

ИкI, чIехи руководителдин патав, халисан пионерди хьиз, рахадай ихтияр авани лагьана, хабар кьуна, 28-нумрадин юкьван школадин 5-класс­дин ученик Къазанфар Жалиловни фена ва, марф къвайила, маса чIимелвилер хьайилани, школадин патарив  гвай майданра ятар кIватI жез, аялривай тарсариз физ тежезвайдакай лагьана, чпиз куьмек гун тIалабна.

Республикадин Кьили аялдин гафариз дикъет­дивди яб гана ва гъиле-гъилди вичихъ галай тайин­ ксариз мектебдиз, гежел тевгьена, куьмек авунин тапшуругъ гана. Ахпа субботникдин иштиракчияр тир аялрихъ галаз шикиларни яна. (Шикилда Къазанфар Владимир Васильеван патав гва).

Къейд. 28-нумрадин юкьван школадин патав гвай майданра къулайвилер тваз, махсус бри­гада атанва.

Чи мухбир