22-январдиз меркезда Дуствилин кIвале Дагъустан Республикадин Кьил Владимир Васильева терроризмдиз акси Милли комитетдин председателдин заместитель Игорь Сироткинахъ галаз санал РД-дин терроризмдиз акси комиссиядин заседание кьиле тухвана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Мярекатдин сергьятра аваз 2018-йисуз РД-дин АТК-ди кьиле тухвай кIвалахдин нетижаяр кьуна, гьакIни гъилевай йисуз ийидай крар веревирдна ва тайин план тестикьарна.
КIватI хьанвайбур тебрик авуналди, Владимир Васильева дагъустанвийрин хатасузвал хуьнин ва регион вилик тухунин жигьетдай гьялзавай месэлайрин важиблувал къейдна. Кьилди къачуртIа, ада лагьана: “Алатай йисуз республикада гьалар хъсанвилихъ элкъвенвайди ашкара месэла я. Гьукумдин органри къайдаяр хуьдай къурулушрихъ, общественный ва диндин организацийрихъ галаз санал кьиле тухвай жуьреба-жуьре мярекатри, крари терроризмдин хаталувал тIимиларна ва регионда, санлай къачурла, гьалар пайгардик кутадайвал хьана. Ида сифте нубатда республикадин общественный къурулушда ва экономикада гьалар хъсанвилихъ дегишардай шартIар яратмишна. Идалди рази хьана акъвазна виже къвезвач, терроризмдиз акси кIвалах давамарун лазим я”.
Вичин нубатда, Игорь Сироткина тестикьарна хьи, саналди тухвай мярекатар себеб яз республикадин мулкуна терактрал эхир эцигна, терроризмдихъ галаз алакъалу дестейри ийизвай тахсиркарвилерин кьадарни хейлин тIимиларна. Идахъ галаз сад хьиз республикадин Минкомсвяздини профилактикадин кIвалах тухунин карда вичин роль хкажна. Алатай йисан кIвалахдин нетижаяр фикирда кьуна, НАК-дин председателдин заместителди РД-дин АТК-дин кIвалахдиз дуьзгуьн къимет гана.
РД-дин Гьукуматдин Председателдин заместитель Рамазан Жафарова. Дагъустан Республикада терроризмдиз акси яз тухузвай ва тешкилзавай мярекатрин гьакъиндай талукь къуллугъчийрин жавабдарвал хкажуникай лагьана.
АТК-дин заседанида РД-дин Гьукуматдин Председатель Артем Здунова, Халкьдин Собранидин Председателдин Сад лагьай заместитель Сайгидагьмед Агьмедова, АТК-дин председателдин заместитель, Россиядин ФСБ-дин РД-да авай Управленидин начальник Олег Усова, къенепатан крарин министр Абдурашид Мегьамедова, Росгвардиядин Дагъустанда авай Управленидин начальник Мегьамед Баачилова, АТК-дин членри, НАК-дин аппаратдин векилри, республикадин министерствойрин, ведомствойрин руководителри, шегьеррин ва районрин кьилери иштиракна.
«Лезги газет»
