“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, Дагъустандиз федеральный 48 проект уьмуьрдиз куьчуьрмишун патал 17 млрд манат пул чара ийида. Республикади РФ-дин стратегиядин макьсадрикай ва милли месэлайрикай ибарат проект уьмуьрдиз куьчуьрмишунин карда иштиракзава. Адак милли 12 проект акатзава. Абурун сергьятра аваз федеральный 67 проект туькIуьрда ва уьмуьрдиз куьчуьрмишда.
Алай йисан 15-февралдалди гьукумдин федеральный органрихъ галаз 48 проектдин жигьетдай икьраррал къулар эцигда. Идахъ галаз алакъалу яз, региондин ведомствойрин кьиле авайбуру талукь документар гьазурда.
Республикадин инвестицийрин программадин сергьятра аваз Дагъустанда эцигунрин 174 объектдиз пулдин такьатар чара ийида, абурукай 100 алай йисуз ишлемишиз вахкана кIанзавайбурук акатзава.
И йикъара Махачкъалада кьиле фейи совещанидал РД-дин Кьил Владимир Васильева къейд авурвал, республикадиз еке такьатар чара авунва. Адан гафаралди, эгер кIвалахди нетижаяр тагайтIа, йисан эхирдалди къуллугърал вири аламукьдач. Региондин Кьили икьраррал къулар чIугун патал герек къвезвай документар вахтунда гьазуруниз кьетIен фикир гун тапшурмишна.
РД-дин образованидин ва илимдин министр Уммупазиль Омаровади къейд авурвал, 2019-йисуз республикада аялрин 52 бахча эцигун фикирдиз къачунва. Министерстводи милли “Образование” проектдин сергьятра аваз федеральный 8 ва “Демография” проектра иштиракзава.
Дагъустандин эцигунрин ва ЖКХ-дин министр Малик Баглиева хабар гайивал, ведомстводи региондин пуд программа уьмуьрдиз куьчуьрмишунин карда иштиракзава. Санлай къачурла, и программайриз 1,3 млрд манатдилай виниз пулдин такьатар чара авунва.
РД-дин тIебиатдин ресурсрин ва экологиядин министерстводи “Экология” — “Чистая вода” ва “Обработка твердых бытовых отходов” федеральный кьве программада иштиракзава. Ведомстводин кьил Набиюла Къарачаева Владимир Васильеваз кьве йисан къене зирзибил жуьрейриз килигна чара ийидай (мусоросортировочный) вири комплексар кардик кутада ва 2020-йисуз завод эцигунин проект акьалтIарда лагьана гаф гана.
Къейд ийин хьи, зирзибил жуьрейриз килигна чара ийидай сад лагьай комплексди алай йисуз вичин кIвалах гатIунда.
Чи мухбир
