Ахварай заз
Буба акунай ахварай заз.
Чин ачух тир, вич — дамах гваз…
Гуьзел къаматдихъ бубадин,
Гьикьван вахт тир зи вил галаз.
Раханай чун халкьарикай,
Дагъларикай, багъларикай,
Авур-тавур крарикай,
Хъсан ва пис ксарикай.
Лагьанай хьи бубади заз:
Угърашдикай хьухь вун яргъаз,
Табдайдакай, вилер ргаз,
Вич батIул яз, гъилер зурзаз.
Жуван Ватан, хайи макан,
Гьам ви ери-бине я, хва
Гьикьван дагълар ятIан кьакьан,
Уьтквем рикIер, вине я, хва…
— Умудзава, къадим халкь зи биневай,
Синел жеда виридалай виневай.
Чан хкведа чуьллерални яйлахрал,
КIеретI-кIеретI рушар къведа булахрал.
«Лезги газетдин» 2019-йисан 1-нумрадай.
_________________________________________________________
* * *
Дигмиш бегьер акуна, ашкъи къведа гьевесдиз,
Къурухда векь такуна, къилав гумир дергесдиз,
Яцра цайид яцраз хьайла, вуч ама кьван иесдиз.
Иесидиз кIан хьайила, вуч ава кьван миресдиз.
* * *
Гьикьван патаз килигйтIан,
Эхир кьисмет сад жеда ваз,
Квачиз тумар гилигайтIа,
КIвалин къадир, дад жеда ваз.
Дараматар эцигайтIа,
Хтулар цIуд-къад жеда ваз,
Зулуз къелем илигайтIа,
Бул емишрин гад жеда ваз.
* * *
Акьул авай келледиз
Кагьул гъилер мукьва туш.
Кар авачиз дегьнедиз
Гьахьун, заз чиз, файда туш.
Туьнт къалурун дидедиз
Кьиле фидай савда туш.
Жуван ери-бинедиз
Гьуьрмет тавун къайда туш.
* * *
Савда авай чкада адет я хуьн михьивал,
Гьар шей вичин къайдада къачуз ашкъи жеривал.
Алцумда, тIям аквада, тадач кIваляй гъайивал,
Буш жез тахьуй, жакьвада гьарда вичиз кIанивал.
* * *
Мез кутамир кардик вуна,
Фикир кьилиз татанмаз,
Ван кутамир тардик вуна,
Ви сес дигмиш тахьанмаз,
* * *
Гатуз санал кIватIда девлет,
АкьалтIарда кIерецдилай.
Къунши мукьвал я, гьелбет,
Яргъал алай миресдилай,
* * *
Къван вегьемир къуйдиз вуна,
Яд хъун герек къвен хъийида,
Вил ягъ жуван буйдиз вуна,
ВикIегь эркек жен хъийида.
* * *
ЯкIв яда на мегъуьн тарциз,
Вири таму ванда лугьуз,
Къуьл вегьеда регъуь къванциз,
ТIанурдин фу кIанда лугьуз.
* * *
Шкьакьдай кьвед акъатда ,
Гьахъ-гьисаб дуьз тахьайтIа,
Гъилевай къвед акъатда,
Яракь кьаз чиз тахьайтIа.
* * *
Гъурбатда хан жедалди,
Ватанда лукI хьун хъсан я,
Жуваз гьарам недалди
Кесибариз гун хъсан я.
* * *
Аш амач, кьве вечре кака,
Хкудмир жув гьалалдикай,
Къе пай авач, вун ша пака,
Къачу бубад кавалдикай.
* * *
ЦIухъай кичIе хьун хъсан я,
ВацIуз гьахьмир кар авачиз,
Белки, кицIи кьун хъсан я,
Куьчебасан тIвар авачир.
* * *
Дамахзавай чакъалди:
“ЦIару сев зи халу я”.
Чизвач къенин йикъалди,
Ам масадан далу я.
* * *
Ксай месик иситIа
Дарман жеда бедендиз,
Гьар къуз жагъиз хьайитIа,
Мугьман жеда Дербентдиз.
* * *
Фикирар сад хьайила,
Дуствал жеда хъсанди,
Сад Аллагьди гайила,
Лаш ягъ вуна шейтIандиз.
«Лезги газетдин» 2019-йисан 47-нумрадай.
________________________________________________________________
Халкьдин Хазинаяр
* * *
ЦIай ала цIегь тIуьрдан кьилел,
Гьарам зегьмет ширин жеда,
Нефс пехъи яз ацIай вилел,
Халкьдин лянет къалин жеда.
* * *
Вичин писвал тайин я чаз,
Иви хъваз чан ифирдайла,
Назик макьам, япал зил кьаз,
Чидайдаз ветI чуьнгуьрдай я.
* * *
Гзаф рахаз кIандатIа ваз,
Яб гузни чир хьун хъсан я.
Кпул кьунвай темпел юкьваз,
Верг илигна, кун хъсан я.
* * *
Мугьман кIвалин берекат я лугьуда,
Ая дамах, чIехи гьуьрмет зурба я.
Муаллим хуьруьн гьерекат я лугьуда,
Илим-булах, вич кьвед лагьай буба я.
* * *
Кьабулда вун ви парталдиз килигна,
Рекье твада, къимет гана келледиз.
Кесиб ятIа, акъудда лаш илигна,
Пул ава вахъ, гьуьрмет — ери-бинедиз.
* * *
Буба течиз, ханвал ийиз алахъмир,
Уба течиз, чубанвиле кIвалахмир.
Гъуцар патай пай ганва гьар са касдиз,
Жув лаш ятIа, къуллугъ ая кIарасдиз.
* * *
Къенин кIвалах гьич вегьемир пакадал,
Жуван кар на къе бегьемар, регьят я.
Сар алай туш вечре хайи какадал,
На лугьуди, хипер-малар кьегьят я.
* * *
Аш акурла, агатда,
Иштягь хъсан я касдин.
Лаш акурла, къакъатда,
Къадир чида кIарасдин.
* * *
Я пул кIанда куьтягь тежер,
Я мез кIанда ширин тир.
Кесиб чанда, лап эх тежер,
Дердер жеда дерин тир.
* * *
Пирпил хьана тамамдиз,
Кьежирайла марфади,
Кесиб фейла гьамамдиз,
Ятар кьуна муркIади.
* * *
Канабар авай кафирди
Къелетна лап кьадарсуз:
Рекьяй физвай фагъирдин
Кьил хана кьван хабарсуз.
* * *
Яц хьтин а итимдилай
Итимвал квай яц хъсан я.
Къадир течир етимдилай
Гьуьрмет хуьдай кац хъсан я.
* * *
Са фитнечи хуьруьз бес я,
Са къелечи — куьчедиз.
Са чекмечи кIвализ бес я,
Са зуьрнечи — дередиз.
* * *
ЧIехи мажиб къачудалди,
Гьамбарханад иес хьанайтIа.
…Дустагъдин кар атIудалди,
Тарашайбур бес хьанайтIа.
* * *
На къуьр яна рекьидалди,
Гьайвандин хам алажмир,
Чрай емиш жагъидалди,
Таран хилер акъажмир.
* * *
Чара касдин мехъерилай
Жуван кIвале мел хъсан я,
АлтIушнавай пехъерилай
Лекьре тадай гел хъсан я.
«Лезги газетдин» 2020-йисан 2-нумрадай
__________________________________________________________________________
Коронавирус
Вири халкьар бизар хьана,
Чаз тийижир азар хьана,
ИчIи хьайи базар хьана,
Вун завал я, коронавирус.
Галукь тавур кIвал тунач на,
Къапу, гьаят, цал тунач на,
Къалур тавур тIал тунач на,
ЧIуру гьал я, коронавирус.
Бейкарна халкь, хизанар,
Сабурар гуз азанар,
Садакьа гуз къазанар,
Вун са тIал я, коронавирус.
Халкьдиз кеспи, пеше амач,
Чи кар, кIвалах ише амач,
Пешекарар виже амач,
ЦIурурай вун, коронавирус.
Терг хьурай вун, гел акъатна,
Кьам ягъайла, пел акъатна,
Каф кьилеллаз сел акъатна
Терс тIугъвал я, коронавирус.
«Лезги газетдин» 2020-йисан 23-нумрадай.
____________________________________________________________________________________________________________________________________
Хкудмир жув гьалалдикай…
Халкьдин ихьтин насигьат, вичин эсерра аваз, чи вилик гъанвайди асул пешедай технолог, Дагъустан Республикада Россельхознадзордин госинспектор я. ДГТУ-дин технологический факультет акьалтIарна, чи меркезда, Каспий гьуьлуьн портуна набататчивилин суьрсетрал гуьзчивал тухузва. Саки 40 йисуз!
Руьгьдал гьалтайла, ам шаир туш садани лугьудач. ГьикI хьи, хайи чIалан ивиррив ам гьакьван къадирлувилелди ва устадвилелди экъечIзава.
Вагиф Рамазанов шаиррин Мекка тир СтIалдилай я. Шак алачиз, ада ХХ асирдин Гомер СтIал Сулейманан абукевсер булахдай яд хъванва!
СтIалви шаирар тир Саядан, Мислиматан, Сажидинан, Фейзудин Нагъиеван эсерралди тербияламиш хьанвай и авторди халкьдин сивин яратмишунрикай гегьеншдиз менфят къачузва. Им адан эсеррин асул кьетIенвални я.
“Лезги газетдизни” ам сифте яз “Халкьдин жавагьиррин бинедаллаз” рубрика гваз атана, гилани а рехъ давамарзава. Чи фикирдалди, им хъсан рехъ ва тежриба я.
Вагиф Рамазанован и йикъара 65 йис хьанва. Яратмишзавай кас патал им лап чрай, сеслу ва кесерлу эсерар кхьидай вахт я. Вагифани вахт гьавайда ракъурзавач. Чи вилик квай шииррин кIватIалдини а кар субутзава. Рехъ давамара, гьуьрметлу кас! Вахъ цIийи агалкьунар хьун чи мурад я.
Мерд Али
“Лезги газетдин” редакциядин къуллугъчийриз
Чаз гьамиша цIийи хабар гъидайбур,
Хъсанни пис, гьахъни батIул чидайбур,
Уьзягъдиз дуьз рекьеваз фидайбур,
Куьн я, гьелбет, чи газетдин дестекар,
Чахъ рикI кузвай архаяр ва куьмекар.
Гьар хемис къуз газетдал чи вил жеда,
КIелай чIавуз, лап ачух гуьгьуьл жеда,
Чаз чи Ватан, дустни душман чир жеда,
Чи къуват я къе куь крар, устадар,
Чи такьат я куь фикирар, баядар.
Лайих фикир, гьахъ келима хкяда,
Дуьздан — тариф, нубатсузда эцяда,
Сада хъверда, муькуьда рак геляда,
Куьн инсанрин гъавурдава, багърияр,
Квез аян я чи рикIерин жигъирар.
Куь гаф вине, къелем хци хьурай, дустар,
Куьн гьамиша гумрагь, верцIи хьурай, дустар.
Бязибуруз
Са бязибуру чIехи уьлкве чукIурна,
Хийирсуз тир гьиллебаз рехъ жагъурна.
Яд кьурурна хуьлерани вацIара,
Дердияр къе туна халкьдин яцIара.
Са бязибур — угърашарни небгетар,
Са бязибуруз — гуж тагана девлетар,
Са бязибур къе хийирдин рекьера,
Са бязибур азиятдин гьекьера.
Са бязибур гуьгъуьнава савдадин,
Либас сад я къе рушанни гададин,
Виждан, намус, ягь лугьудай гафарихъ,
Къуват амач инсанвилин крарихъ.
Бубайри чаз тур весияр, адетар,
Гьайиф хьи, къе гзаф шейэр вай хьана,
Гуьнгуьна тур гьабурун къуват, зегьметар,
БарбатI авур къадирсузрин тай хьана.
ГьакI хьайила, тIалабда за, минетда,
Зи уьлкве мад мублагь жеда, бахт жеда,
Сада-садан хатур, гьуьрмет хвейитIа,
ЧIехи-гъвечIи вири са пад хьайитIа.
Къе чи кьегьал рухваяр,
Вахар, рушар, архаяр,
Ватандихъ рикI кудайбур,
Халкьдиз хийир гудайбур,
Диде-буба чидайбур,
Берекатар гъидайбур.
СикI ва гъуьрчехъан
Няни хьайла, хуьруьхъди
СикI атана зирекдиз,
Вечрен якIухъ къаних яз,
Мугьман хьана демекдиз.
Вегьена кIек кьур чIавуз,
Са гьарай акъат хьана,
Сагьибдиз акур чIавуз,
СикI акъатна, кат хьана.
Сагьиб кас вич — Мисрихан
Гъуьрчехъан тир гьамиша,
КIекрен язух чIугуна,
Амукьна яз перишан.
Пуд (ю)къуз геле хьана ам,
Тфенг къуьнуьв агудна,
Фагъир сикIрен яна кьам,
Тифти цавуз акъудна.
Гъуьрчехъандин кьил гила
Виридалай виневай,
СикIрен хамун бармак са
Кьилел алай вижевай.
Халкьдин жавагьиррин бинедаллаз
Акьул авай келледиз
кагьул гъилер мукьва туш.
Кар авачиз, дегьнедиз
гьахьун, заз чиз, файда туш.
Туьнт къалурун дидедиз
кьиле фидай савда туш.
Жуван ери-бинедиз
гьуьрмет тавун къайда туш.
* * *
Авахьзавай баркаван ци
Къванер чIехи ийида,
Элуькьзавай жуван кицIи
Ванер пехъи ийида.
* * *
Акуна заз са гьиллебаз,
Фу лап кьилиз акъатнавай,
ГъвечIи-чIехи кьазмачир кваз,
Кьама ялар дуьз гьатнавай.
* * *
Аш амач, кьве вечре кака,
Хкудмир жув гьалалдикай,
Къе пай авач, вун ша пака,
Къачу бубад кавалдикай.
Аш акурла, агатда, —
Иштягь хъсан я касдин.
Лаш акурла, къакъатда,
— Къадир чида кIарасдин.
* * *
Ашукь хьанвай кьуьзекни
КIвале кьуна таз жедач.
Гуж авуна, суьзекдиз
Жунгавдин кьил тваз жедач.
* * *
Аялдикай кьепIинавай
Кьегьал, игит хва жеда.
Жуван халкьдин дердинавай
Кесибризни арха жеда.
* * *
Данадикай жунгав жеда,
Дегишда еб мерездал,
Хци чукIул ялав жеда,
Алцумда ам терездал.
* * *
Акур-акур рушал ашукь хьайитIа,
Амукьда вун паб авачиз.
Гъваш, за неда — лугьуз, ацукь хьайитIа,
Жеда кIвале къаб авачиз.
* * *
Булушкадик гар жеда,
Къуьневайди квар жеда.
Ярдин гъиле тар жеда,
Мецелни ви тIвар жеда.
* * *
— Буба, гьикьван эхда чна кесибвал?
— ЯхцIур юкъуз,- жаваб гана бубади.
— Ахпа вучда, суфрадал вуч эцигда?
— Вердиш жеда, гуда, белки, Худади .
* * *
Буба течиз, ханвал ийиз алахъмир,
Уба течиз, чубанвиле кIвалахмир,
Гъуцар патай пай ганва гьар са касдиз,
Жув лаш ятIа, къуллугъ ая кIарасдиз.
* * *
Багъдадда лам кьве шагьи я лагьайла,
Шад хьанай лап, уьзягъдиз фейи чун,
Аламатдин къимет авай атайла:
Садра ламрал акьахна хьиз, эвичIун.
* * *
— Вуч багьа я девлетдилай? —
Чандин сагъвал, — жаваб я.
ЭлячIмир вун гьуьрметдилай,
Уьзягъвал суваб я.
* * *
Вичин писвал тайин я чаз,
Иви хъваз, чан ифирдайла,
Назик макьам, япал зил кьаз,
Чидайдаз ветI чуьнгуьрдай я.
* * *
Ваз кIанибур вад аватIа,
Вун такIанбур къад ава.
Муьгьуббатдин дад аватIа,
Вахъ рикI кудай сад ава.
* * *
Гьахъ жагъуриз къекъвена сад,
Яргъал рекьер акъудна,
Хтай чIавуз хьанач ам шад,
КIвалахдилай алудна.
* * *
Гатуз кIватIда санал девлет,
АкьалтIарда кIерецдилай,
Къунши мукьвал я, гьелбет,
Яргъал алай миресдилай.
* * *
Гафар цIалцIам, крар жеда терсеба,
Гагь дуьз рахаз, гагьни къведа терхеба,
Келимайрин жедайвал ван тамамдиз,
Гарданд цамар яхъ на жуван
тIарамдиз.
* * *
Гафунин кьил акъудна,
Тум чуьнуьхмир далдадик.
Жуван фикир ачухна,
Кутамир кьил баладик.
* * *
Гьикьван патаз килигайтIан,
эхир кьисмет сад жеда ваз,
Квачиз тумар гилигайтIа,
кIвалин къадир, дад жеда ваз.
Дараматар эцигайтIа,
хтулар цIуд-къад жеда ваз,
Зулуз къелем илигайтIа,
бул емишрин гад жеда ваз.
* * *
Гъурбатда хан жедалди,
Ватанда лукI хьун хъсан я,
Жуваз гьарам недалди,
Кесибариз гун хъсан я.
«Лезги газетдин» 2020-йисан 40-нумрадай.
_________________________________________________________________________________________________________________
Текьей къуьрен шурваяр
Гьар няниз луьх пияндиз хквезвай Цмихан адетдиндалай фад инсандин къаматда аваз кIвализ гьахьайла, папаз шад хьанвай. Гъил-затI чуьхвена, столдихъ ацукьна, ада еке дамахдивди лагьана: “Къари, заз гектар кьаз кIанзава. Гъваш са шуьше эрекь, ихтилатар ийин чна гила”.
Папа шуьше гъана, са рюмка ацIурна. “Чна помидорар цада, паб”, — лагьанай, Цмихана кьвед лагьай рюмка ичIи хъувуна.
Папа дикъетдивди яб гузвай, ам гзаф шад тир. Столдал уькIуь-цуруни эцигнавай. Хийирлу кардикай, кIвалахдикай и кIвале им сифте сефер ийизвай ихтилат тир. Авай са хвани атана столдихъ ацукьнавай.
“Помидоррин бегьер къачуна, — давамарна Цмихана, — чна абур Урусатдиз тухуда, пул гваз хтайла, къари, чна са машин къачуда”.
Ихтилатар къизгъин хьанвай, шуьшени явашдаказ ичIи жезвай.
“Вунни къвалав ацукьарна, къари, чун машинда аваз мугьмандиз фида, сифте ви диде-бубадал са кьил чIугвада чна”, — лагьайла, гададай гьарай акъатна:
“Дахдин къвалав зун ацукьда машинда, заз гьализни чирна кIанзавайди я”.
Дидеди лагьана: “Ваъ, зи итимдин къвалав зун ацукьда”.
Гада рази хьанач. Садазни шофердин къвалав гвай чка гъиляй ахъайиз кIанзавачир. Дидени хва гьуьжетриз акъатна. Вилик квай шуьшени ичIи хьанвай, бубадиз мад ихтилатрикай гьяз къвезмачир, эхирни ада гьарайна: “Бес хьурай гьуьжетар, эвичI кьведни машиндай!”.
«Лезги газетдин» 2020-йисан 41-нумрадай.
_______________________________________________________________
Туьнт инсанар я
Махачкъалада, Карл Марксан куьчеда (гилан Акушинскийдин), Сепараторрин заводдин къаншарда, рекьяй физвай машинриз манийвал тахьурай лагьана, чиликай и патай а патаз экъечIдай рехъ ахъайнавай йикъар тир. Инсанрин чIехи пай, вердиш тирвал, машинрин виликай катзавай. Сад-кьвед цIийи рекьяй экъечIзавай.
Москвадай командировкадиз атанвай са инженер рекьин агъа патай Сепараторрин заводдиз фена кIанзавай. Рекьин къерехда акъвазна, килигна, машинар кьери хьайи арада рекьелай элячIзавай.
Рекьин юкьвал агакьна, акъваз хьана. Лап йигиндиз атай “Москвичдай” са жегьил эвичIна, инженердихъ элкъвена: “Для вас, козлов, специально подземный переход построили”, — лагьана, машинда ахцукьна рекье гьатна.
Командировкадиз атанвай инженер чIехи меркездиз хъфейла, санал кIвалахзавай юлдашри: “Бес гьихьтинбур я дагъустанвияр?” — хабар кьуна.
“Адетдин инсанар я, са тIимил туьнт. Амма гъвечIи-чIехи чидайбур я.
Зун лазим тушир чкадилай рекьелай элячIдайла, залай яшдиз гъвечIи сада, машин акъвазарна, зи фамилия кьуна, а патаз экъечIдай рехъ къалурна…”
Инженердин фамилия Козлов тир.
«Лезги газетдин» 2020-йисан 48-нумрадай.
________________________________________________
* * *
Гзаф рахаз кIандатIа ваз,
Яб гузни чир хьун хъсан я.
Кпул кьунвай темпел юкьваз,
Верг илигна, кун хъсан я.
* * *
Девлет пара, ацIай руфун,
Руьгь кесиб я лугьуда,
Ялар кьама, кьил вине кьун
Лап айиб я лугьуда.
* * *
Девлетлу кас дамахарна атайла,
— Мубаракрай,- вирида чеб къалурда.
Кесиб касдал цIийи валчагъ алайла,
— Ам гьинай я? — лугьуз, синих жагъурда.
* * *
Дугъри касдал тахсир къведа
БатIул ксар катай чIавуз.
Тахсикардал эхир къведа,
Къяна ракьар гьатай чIавуз.
* * *
Марф авачтIа, цав тахсирлу я жеди,
Сад Аллагьди пис кIвалахар ийидач,
ТIили къвезва, къав тахсирлу я жеди,
КIватI куруниз, ахпа, белки, жагъидач.
«Лезги газетдин» 2021-йисан 1-нумрадай.
______________________________________________________________________________________
* * *
Дамахзавай чакъалди:
— ЦIару сев зи халу я.
Чизвач къенин йикъалди —
Ам масадан далу я,
* * *
Жуван виле вагьрам аваз,
Масад виле кьал жагъурмир.
Муьхце гумрагь ви лам аваз,
Къванер чIугваз кал жагъурмир.
* * *
Зурба кас туш, заз чир гьал,
Садрани алукь тавурди.
Алукьайди, ам я кьегьал,
Ахпа къарагъ хъувурди.
* * *
Инлай-анлай гъал кIватIайла,
КIецIилдаз перем цваз жеда.
Салаз жугъун — тIвал кIватIайла,
Афни, хъач, келем цаз жеда.
* * *
Итим ятIа, гаф тIарам яхъ,
Лагьанани — квадармир.
Етим ятIа, саф тIарам яхъ,
Жагъанани — гадармир.
* * *
КицI кицIел элуькьай чIавуз,
Саилдиз рехъ ачух хьана.
ЧрайтIа мад сад ви япуз,
Акъвазмир вун кьулухъ хьана.
* * *
КицIин дафтарда гьатда тIвар —
Гьарам кIватIмир киседиз.
Ватан хуьн я кьегьалдин кар,
Гьуьрмет авун дидедиз.
«Лезги газетдин» 2021-йисан 13-нумрадай.
___________________________________________________________
* * *
Кесибдиз яцар хьайила,
Маларин азар акъатна.
Марфар къвана, кьар хьайила,
КIвалахдайдаз кар акъатна.
* * *
Канабра авай кафирди
Къелетна лап кьадарсуз.
Рекьяй физвай фагъирдин
Кьил хана кьван хабарсуз.
* * *
Камаллуда чирвилерал дамахда,
Девлетлу кас девлетар хуьз алахъда.
Камаллуда бул девлетар гирнагъда,
Девлетлу кас камалд вилик авагъда.
* * *
Камаллу гаф къизилдилай багьа я,
Камаллу кас вич виридан буба я.
Дуьз фикирар тIуруналди кIватI жеда,
Пис фикирар, зунжурар хьиз, кьатI жеда.
* * *
КицIи кицIин як недач,
Шурпа са кур вилик хьайтIа,
Са бязибуру вак недач,
Гьерен ютур гъилик хьайтIа.
* * *
Кар туькIвейла, акъвазмир вун базарда,
Герек дерди бегьемарна, кIвализ хъвач.
Ваз лугьуда: “Вун авай гьи азарда,
Вал вил алаз, ргаз кьена къулал тIач?”
* * *
Кар туькIуьдалд къецел къвазда,
Гьейран хьана гъетерал.
Бурж къачурла, кIвачел къвазда,
Вахкудайла — метIерал.
Ксай месик иситIа
Дарман жеда бедендиз.
Гьар къуз жагъиз хьайитIа,
Мугьман жеда Дербендиз.
* * *
КIвалин хабар — гъвечIидавай,
Хуьруьн хабар — чIехидавай,
Серин хабар — гижидавай,
Ширин хабар — бажидивай.
* * *
Къван вегьемир къуйдиз вуна,
Яд хъун герек къвен хъийида.
Вил ягъ жуван буйдиз вуна,
ВикIегь эркек жен хъийида.
* * *
Къенин кIвалах гьич вегьемир пакадал,
Жуван кар на къе бегьемар — регьят я.
Сар алай туш вечре хайи какадал,
На лугьуди, хипер-малар кьегьят я.
* * *
Кьил атIана, руфуна тур,
Азаб гумир нефсиниз.
Жунгав йифиз дугуна тур,
Жанавуррин дердиниз.
* * *
Кьабулда вун, ви парталдиз килигна,
Рекье твада, къимет гана келледиз.
Кесиб ятIа, акъудда лаш илигна,
Пул ава вахъ — гьуьрмет ери-бинедиз.
* * *
Лам хвейитIа, лам амукьда,
Лам кьейитIа, хам амукьда.
Девирар туш, хийирлу шей гадардай,
Хъсанни пис берекатсуз квадардай.
* * *
Ламра кIуру ягъайди
Акъат хьана женнетдиз.
Инсанари, сурал физ,
Икрамзава гуьмбетдиз.
* * *
Ламрал крчар алайтIа,
Нехирда малар тадачир.
Яцраз ам ухшар авайтIа,
ТIуна гьич палар тадачир.
* * *
Мекьи кьуьдни кьий, кьуьзуь гъуьлни.
Ифей туьдни кьий, авам кьилни.
Жегьеннемдин рехъ регьят я къалурун,
Четин жеда камаллу гаф жагъурун.
* * *
Меслятдалди авур аш ширин жеда.
Руфуниз на гумир каш — гишин жеда.
Вил алайтIа, фимир яваш, серин жеда,
ВацIай экъечI гъилеваз лаш, дерин жеда.
* * *
Мешребсуз паб гъуьлуьз ганвай бала я.
Белки, заз чиз, кар алач са абурдал.
Гвачир кас таб дердинин лап дава я,
Гьейранариз намусдални сабурдал.
* * *
Масадаз сир чирмир жуван,
Я кьуьзуьд жен ам, я жаван.
Акьуллу хьухь, эй бейниван,
Ийиз тамир на ви дуван.
* * *
Мез кутамир кардик вуна,
Фикир кьилиз татанмаз.
Ван кутамир тардик вуна,
Ви сес дигмиш тахьанмаз.
* * *
Маса касди ийидай кар
Регьятди хьиз аквада.
— Къарагъ, темпел, чир жуван тIвар,
Къаткайла, кьил дакIвада.
* * *
Мугьман кIвалин берекат я лугьуда,
Ая дамах, чIехи гьуьрмет зурба я.
Муаллим хуьруьн гьерекат я лугьуда,
Илим — булах, вич кьвед лагьай буба я.
* * *
Муьгьуьббат вич кIеви жедач дапIардал,
ЭцигайтIан ракьун тIвалар дакIардал.
Хкатда ам бедендикай, цIай хьана,
Ялавлу яз, вич кьве патал пай хьана.
«Лезги газетдин» 2021-йисан 36-нумрадай.
_______________________________________________________
Кьудар
Ужуз къачур як ргайла,
Дадлу шурпа жеч лугьуда.
Кьуланфериз рак гатайла,
Ферли мугьман къвеч лугьуда.
* * *
Фикирар сад хьайила,
Дуствал жеда хъсанди.
Сад Аллагьди гайила,
Лаш ягъ вуна шейтIандиз.
* * *
Фендигар рехъ жагъурна,
Къавумдин кар хьанач хуш.
Гуьзел пери къалурна,
Рекье туна буьркьуь руш.
* * *
Хуьр вири къе меле ава,
Мегьрижан — регъве.
Ам виридан хъиле ава,
Гъуьр амач кIвале.
* * *
Халуд чина акъваздайди хтул я,
Туьнт я хтул, чинни вичин яру я,
Зи фикирдал, ам мад сефер батIул я,
Халу мягькем акъвазнавай пару я.
* * *
ЦIухъай кичIе хьун хъсан я,
ВацIуз гьахьмир кар авачиз,
Белки, кицIи кьун хъсан я,
Куьчебасан тIвар авачир
ЦIай ала цIегь тIуьрдан кьилел,
Гьарам зегьмет ширин жеда,
Нефс пехъи яз ацIай вилел,
Халкьдин лянет къалин жеда.
* * *
ЧIехи мажиб къачудалди,
Гьамбарханад иес хьанайтIа.
…Дустагъдин кар атIудалди,
Тарашайбур бес хьанайтIа.
* * *
Чара касдин мехъерилай
Жуван кIвале мел хъсан я.
АлтIушнавай пехъерилай
Лекьре тадай гел хъсан я.
* * *
Шкьакьдай кьвед акъатда,
Гьахъ-гьисаб дуьз тахьайтIа,
Гъилевай къвед акъатда,
Яракь кьаз чиз тахьайтIа.
* * *
Шишин нидал фейи чIавуз
Ламраз тIамгъа язавай кьван.
Таза ниси гъайи чIавуз
ЦIвегьедик кIус кязавай кьван.
* * *
Шаирдин хатI кьезил жеда,
Алакьунар вахъ аватIа.
Шаирдин гаф къизил жеда,
ЦIарара дуьз гьахъ аватIа.
* * *
Я пул кIанда куьтягь тежер,
Я мез кIанда ширин тир.
Кесиб чанда лап эх тежер
Дердер жеда дерин тир.
* * *
ЯкIв яда на мегъуьн тарциз,
Вири таму ванда лугьуз.
Къуьл вегьеда регъуьн къванциз,
ТIанурдин фу кIанда лугьуз.
* * *
Яна къазра къакъраяр,
Ван хци, вич верцIи тир,
Амма хайи какаяр
НуькIрендалай бицIи тир.
Яц хьтин итимдилай,
Итимвал квай яц хъсан я.
Къадир течир етимдилай
Гьуьрмет хуьдай кац хъсан я.
«Лезги газетдин» 2022-йисан 1-нумрадай.
