Сулейман-Стальский районда Сардархуьр итижлу тарих авайбурукай сад я. Инай жавабдар кIвалахар авур  камаллу рухваяр, рушар тIимил  акъатнавач. Абурун рехъ алай вахтунда жегьилри давамарзава.

Сардархуьруьн школадин 8-классда кIелзавай Феликс (шикилда) 2005-йисуз Темирханов Темирханан хизанда дидедиз хьана. Ада гьа сифте школадиз атайдалай  инихъ хъсан къиметар къачуз кIелзава,  лезги чIаланни литературадин, ингилис чIалан  кружокра иштиракзава.

Суваррин мярекатар кьиле тухудайла, Феликса гьамиша активнидаказ иштиракзава, школадин руководстводи адаз баркалла лугьузва.

Мярекатра ада Етим Эминан, СтIал Сулейманан, Кьуьчхуьр Саидан, хуьруьнви муаллим, шаир рагьметлу Абдурагьман Межидован  шиирар рикI алаз кIелда. Ада конкурсрани иштиракзава.

2017-йисуз ингилис чIалай Вирироссиядин олимпиадада Феликса 1-чка кьуна. 2018-йисан февралдиз ам Россиядин школайра кIелзавай аялрин гьерекатдин “ХъуьтIуьн фестивалда” ингилис чIалай гъалибвилин 1-дережадин дипломдиз лайихлу хьана. Международный дистанционный “Кьуьд-2018” олимпиададин вахтунда ингилис чIалаз талукь “ИНФОУРОК” проектдай Феликс Темирхановаз сертификат гана.

Темирханов Феликс лагьай гаф кьилиз акъуддай, хци зигьин авай, чешнелу  аял я. Адаз муаллимрин ва аялрин арада еке гьуьрмет ава.

Феликсан дах Темирханов Темирхан Сардархуьруьн школадин завуч я. Камаллу бубади вичин кьве веледни инсанпересар яз тербияламишзава. Зегьметдал рикI алай Темирхановрин хизандиз хуьре­ еке гьуьрмет ава.

Вадим Жамалдинов