Къизилгуьлер экъечIналда,

Билбилдин шад ван хьайила.

Райондин олимпиадайрин гъалибчийрин кIватIалдин семинар и сеферда Ярагърин юкьван мектебда тешкилна. Адан программадик дидед чIалай ва литературадай, математикадай ачух тарсар, лезги литературадин нурлу гъед тир Етим Эминан юбилейдиз бахшнавай шад мярекат, гъвечIи классрин аялрин кьуьлер ва пишкешар гун квай.

Лезги чIалан ва литературадин муаллим, конкурсдин гъалибчи Жаруллаева Магьият Гьадисовнади Ярагърин хуьряй шиирар теснифай ксарикай, абурун эсеррикай менфят къачуна, “Ярагърин шииратдин ким” тIвар алаз тухвай ачух тарсуни атанвай мугьманар гьейранарна. Аялри лап ашкъидалди хуьряй акъатай машгьур ксарин весияр, эсерар кIелна, абурун чIалариз лезги композиторри кхьенвай манияр тамамарна.

М.Гьадисовнади тарсуна компьютердикай, интерактивный доскадикай менфят къачуна, эсеррин  авторрикай слайдар къалурна, абурун уьмуьрдай ва эсеррай “Низ гзаф чида?” къугъун тухвана. Эхирдай хайи хуьруькай фильм къалурна. Тарс муаллимди вичи теснифнавай “Зи хайи хуьр” шиир кIелуналди акьалтIарна.

Гьа и мектебдин гъвечIи классрин муаллим Гьажиева Сефият Абдулгьалимовнади 4-классда математикадай “Хуралай ва кхьена гьисабунар” темадай ачух тарс тухвана, атанвай мугьманар шадарна.

Гуьгъуьнлай Мегьарамдхуьруьн 2-нумрадин мектебдин гъвечIи классрин муаллим Манафова Людмила Рамазановнади вичин кIвалахдин тежрибадай (слайдар къалуриз) “ГъвечIи классрин тарсара аялрин къугъунар” темадай  доклад авуна.

Ярагърин юкьван мектебдин дидед чIалан ва литературадин муаллим Эфендиева Эльза Гьадисовнади 8-классдин аялар галаз  Етим Эминаз бахшнавай “Лезги литературадин нурлу гъед” тIвар алай мярекат тешкилна. Аялри Эминан шиирар хуралай кIелна, адан чIалар манидалди тамамарна, “Эминан уьмуьрдин эхиримжи югъ” тIвар алай куьруь сегьне къалурна.

Гьа и мектебдин гъвечIи классрин муаллим Сейфединова Муслимат Муртузалиевнади 3-классдин аялар галаз гьазурнавай кьуьлуьналди мярекат акьалтIарна.

Семинар элкъвей столдалди давамарна.

Гьуьрметлу Ярагърин мектебдин коллектив, квехъ цIийи дараматда кIвалахдай сагъвал хьурай, квехъ мадни еке агалкьунар хьурай!

А.С.Гьажиева, Мегьарамдхуьруьн райондин методкабинетдин методист