Дербентдин медицинадин колледждин директор, Дагъустан Республикадин Общественный палатадин член Светлана Абдурашидовна Гьамзатовадин тIвар неинки вичи  регьбервал гузвай коллективда, гьакI вири шегьерда, гьатта республикадани  гьуьрметдивди  кьазва.

Пешедин халис устад, мергьяматлу, чIехи, жумарт рикI авай и баркаллу дишегьли кьиле авай медколледж Кеферпатан Кавказда лап хъсанбурукай сад яз гьисабзава. Ина чирвилер  ва тербия гунин кIвалахар гьамиша вини дережада ава.

Светлана Гьамзатовади директорвиле кIвалахзвай йисара медколледждин акунар рикIерик шадвал кутадайвал  дегиш хьанва. Виликдай чIехи пай кул-кусри кьунвай анин гьаятар, дараматдихъ галай чил гила муаллимрин  ва студентрин зегьметдалди гзаф жуьрейрин емишрин багъдиз элкъуьрнава. Ватандин ЧIехи дяведин игитрин баркаллувилиз бахшнавай аллеяни туькIуьрнава.

Светлана Абдурашидовнади дерди-бала аваз атай гьар са касдиз вичелай алакьдай куьмекар гузва. Ам “Лезги газетдин” вафалу дуст ва амадагни я.

И мукьвара медколледждин коллективдив, дербентвийрив шад хабар агакьна: зегьметда ва общественный крара чIехи лайихлувилер къазанмишун къейд авуналди, “Кавказдин кукIушар”, “Хайи Дагъустан” общественный объединенийрин ва “Халкьдин фикир”  фондунин къарардалди Светлана Абдурашидовна Гьамзатовадиз “Кавказдин халкьдин игит” тIвар ганва ва адав шад гьалара Къизилдин Гъед вахканва.

Чи мурад баркалладин таж алай лезги вахахъ мадни еке агалкьунар хьун я!

Нариман Къарибов