Аллагь — Таалади лагьана: “Аллагьдиз ибадат ая. Адахъ галаз сад хьиз  — мад садазни. Хъсанвал ая диде-бубадиз, мукьвабуруз, етимриз, муьгьтежбуруз, къуншийриз, мукьвавал аваз, авачиз хьайитIани, -юлдашдиз, рекье авайдаз ва куь ихтиярда авайбуруз” (“Ан-Ниса”, 36).

Ибн Умаралай ва Аишадилай  агакьарайвал, Аллагьдин Расулди (с.а.с.) лагьана: “Жибрила заз къуншидихъ галаз  хъсан рафтарвилин патахъай акьван яргъалди  насигьатар гана куьтягьзавачир, гьатта за фикирна хьи, ада ам ирсдаррин жергеда твада лагьана” (Аль-Бухари, Муслим).

Абу Зарран гафарай,  “Садра Аллагьдин Расулди (с.а.с.) лагьана: “Я Абу Зарр, вуна, як ргадайла, гзаф яд ягъа ва жуван къуншийрин къайгъу  чIугу”  (Муслим).

Абу Гьурайради агакьарайвал, садра  Пайгъамбарди (с.а.с.) кIевиз лагьана: “За Аллагьдал  кьин кьазва, инанмиш жедач (тамамдиз), Аллагьдал  кьин кьазва, инанмиш жедач!”. Адавай хабар кьуна: “Вуж, я Аллагьдин Расул? (с.а.с.)” Ада лагьана: “ А кас, нин къунши адан писвиликай хатасузвиле авачтIа”. (Аль-Бухари, Муслим).

Муслима гъайи и гьадисдин жуьреда лугьузвайвал, Пайгъамбарди (с.а.с.) лагьана: «Женнетдиз фидач а кас, нин къунши адан писвиликай хатасузвиле авачтIа».

Аишади лагьана: “Садра за хабар кьуна: “Я Аллагьдин Расул (с.а.с.), заз кьве къунши ава, тIимил затI авайла, абурукай низ гун лазим я?”  Ада лагьана: “Нин ракIар ваз мукьва ятIа – гьадаз” (Аль-Бухари).

Абдуллагь бин Умара агакьарайвал, Аллагьдин Расулди (с.а.с.)  лагьана: “Аллагь-Тааладин вилик  виридалайни хъсан юлдаш ам я, вичин юлдашдихъ галаз  хъсан рафтарвал нихъ аватIа  ва  Аллагь — Тааладин вилик  виридалайни хъсан къунши  ам я, вичин къуншидихъ галаз виридалайни хъсан рафтарвал нихъ аватIа” (Ат-Тирмизи).

«Ас-салам» газетдай