— Дарчинри куьк инсанриз яхун хьуниз куьмекда. Англиядин диетологри дарчинар вирибуруз ишлемишун меслятзава. Ада ивидик квай холестериндин ва шекердин кьадар тIимиларда, обмендин процессар йигинарда. Ам чайдиз, кофедиз ва хуьрекдиз вегьена ишлемишда.
— Лимон, апельсин, мандарин, грейпфрукт инсандин бедендиз гзаф хийирлу майваяр я. Абур чпин сагъламвилин къайгъуда авай гьар са касдин суфрадал хьана кIанда. ГьакIни гьар экуьнахъ чими цихъ ва са кIус лимондихъ галаз са тIуруна авай виртни ишлемишун хийирлу я.
— РикIи фад-фад (аритмия) кIвалахзавайла, са йисан вахтунда пурнийрин къаришма ишлемишда. Ам икI гьазурда: чайдин са тIуруна авай пурнийрал са стакан ргазвай яд илична, 20 декьикьада тада. Ахпа ам куьзна, йикъа 2 сеферда хъвада.
— Агъургъан (аллергия) хьанвайла, активированный уголь (гьар сеферда 6 таблетка) регъвена, 40 юкъуз ишлемишда.
— Хуквадин мижедик квай кислотность хкажун патал хуьрекдин са тIуруна авай вирт стакандавай циз вегьена, цIурурна, фу недалди вилик 1,5-2 вацра ишлемишда.
— ЦIуд йисаралди мобильный телефонар ишлемишзавай инсанрин япар дакIунин, ван, сес атун зайиф хьунин къурхулувал ава. Гьавиляй, рахадайла, трубка япал илисна кьун тавуна, са тIимил яргъа кьуртIа хъсан я. Трубка аялрив вугун тавун меслятзава.
— КIвачин еке тупIун кIараб тIазвайла, 50 г нашатырдин спирт ва гьакьван глицерин сад-садак какадарна, са бутылкадиз цада. Ахпа а къаришма тIазвай кIарабдивай гуьцIда.
— Яру чехирди жалгъайра авай тIал секинарда. Са стаканда авай яру чехирдик хуьрекдин кьве тIуруна авай горчица какадарда. Ахпа и къаришмадай салфетка кьежирна, 15 декьикьада тIазвай жалгъайрал эцигда. Ихьтин процедура са шумуд юкъуз ийида.
— Мадни, келемдин са пешинивай къазан запун (харчи запун) гуьцIна, хуьрекдин сода кIвахна, винелай мад са келемдин пешиналди кIевирна, тIазвай чкадал эцигна, чими шарф алчукда. Ихьтин компресс йифиз авун меслятзава.
— Кьилин къати тIалар авайла, тутун тарцин хилер куьлуь авуна, 1 л къайи яд илична, 20 декьикьада зайиф цIал эцигда. Ахпа ам са сятда кIевирна тада. Фу нез 30 декьикьа амайла, са стаканда авайди хъвада. И къаришма 2-3 вацран вахтунда ишлемишда.
Гьазурайди — Надият Велиева
