15-декабрдиз Махачкъалада хуьруьн майишатдин суьрсетдин мекера кьиле фена. Мярекат РД-дин хуьруьн майишатдин ва недай суьрсетдин министерстводи гьазурнавайди тир.
Меркездин Пушкинан тIварунихъ галай куьчеда Леваша, Акуша, Къаякент, Казбек, Мегьарамдхуьруьн, Сулейман-Стальский, Къизилюрт, Хасавюрт ва хейлин маса районрин хуьруьн майишатдин зегьметчийри чпи гьасилзавай суьрсет майдандиз акъуднавай. Махачкъаладин агьалийриз инай жуьреба-жуьре емишар, майваяр, кьурурнавай емишрин патар, як, дулдурмаяр, некIедикай гьазурнавай шейэр, консервияр, дарманрин хъчар ва хейлин маса шейэр шегьердин базарра авай къиметрилай ужуз маса къачудай мумкинвал хьана.
Идалайни гъейри, мярекатда республикадин гьар жуьре районрай тир художественный яратмишунардайбурун коллективрини иштиракна. Мекерадиз атайбуруз ина милли тIуьнар дадмишун, самовардин чай хъун теклифзавай.
Мярекатда РД-дин Гьукуматдин Председатель Артем Здунова, РД-дин Кьилин ва Гьукуматдин Администрациядин Руководитель Владимир Иванова, Гьукуматдин Председателдин заместитель — РД-дин хуьруьн майишатдин ва недай суьрсетдин министр Абдулмуслим Абдулмуслимова, Махачкъаладин мэрдин везифаяр вахтуналди тамамарзавай Мурад Алиева, районрин кьилери иштиракна.
“Мекера агьалияр патал хийирлуди хьана кIанда. Гьелелиг и мярекатда иштиракиз кIанзавайбур патал ина чкаяр бес кьадарда ава. Амма шегьердин властдихъ элкъвена гуз кIанзавай са теклиф ава: инсанривай инай ужуз къиметрай таза суьрсет къачуз жедайвал, мекераяр мукьвал-мукьвал тешкилун герек я. Идалайни гъейри, ина алишвериш кьиле тухузвай ксар, гьакIни муьштерияр патални къулайвилер арадал гъана — биотуалетар, зирзибил кадардай кьватияр эцигна кIанда. Мярекат кьилиз акъатайдалай кьулухъ шегьердин михьивал къайдадикай хкатун лазим туш”, — лагьана А.Здунова.
Хуьруьн майишатдин мекерадиз хъсан къимет Владимир Ивановани гана: “Инанмиш я, виридалайни дадлу ва ерилу суьрсет чина гьасилзава. Дагъустанда саки вири жуьрейрин хуьруьн майишатдин суьрсет гьасилдай мумкинвилер ава. Чи продуктар гьам экологиядин, гьамни дадлувилин жигьетдай хъсанбур я. Республикадиз мугьман хьайи ксари гьамиша и кар къейдзава. Чи продуктрихъ тешпигь авач. Гьаниз килигна, зун инанмиш я, чна и хел виликди тухвана, хуьруьн майишатдин суьрсет гьасилзавай ксари чпин кIвалах гегьеншарна кIанда, Россиядин гьар са регионда Дагъустандай тир продуктар жедайвал”, — малумарна вичин фикир В.Иванова.
Абдулмуслим Абдулмуслимова къейд авурвал, мярекатдин асул везифа шегьерэгьлийриз тIем акакьдай къиметрай виниз тир еридин суьрсет маса къачудай мумкинвал арадал гъун я. Гьа са вахтунда, им Дагъустандин хуьруьн майишатдин суьрсет гьасилзавайбур патални майдандиз экъечIдай, чпикай малумвал гудай мумкинвал я.
“Мекерадиз чпин суьрсет гьар жуьре районрай тир 100-далай гзаф карчийри гъанва. Инай квез “Къизлярагрокомплексдин”, “КъизлярУрицкий якIун комбинатдин”, “Къурбансервис” ООО-дин ва гьялдай промышленностдин са жерге маса карханайрин продукция, Мегьарамдхуьруьн райондин хурмаяр, Ахцегьрин ичер, Къулидин нисияр, дагъдин дулдурмаяр, гьатта чIулав куьрни кваз жагъида”, — лагьана ада.
“Мекерадин кьетIенвилерикай сад ам я хьи, суьрсет гьасилзавайдан ва ам маса къачузвайдан арада маса кас жезвач. Гьаниз килигна, махачкъалавийриз ихьтин мярекатар мукьвал-мукьвал, хьайитIа, вацра са сеферда кьванни кьиле тухвана кIанзава. Гьа са вахтунда, ам шегьердин кьилин куьчейрикай сана тешкилуни шегьерда транспортдин гьерекат патал къулайсузвилер арадал гъизва. Мукьвал-мукьвал чаз гузвай суал я: вучиз мекера шегьердин къерехда тешкилзавач? Вучиз лагьайтIа, икI хьайила, пенсионерриз, зегьметдин ветеранриз, зайифдаказ таъмин тир маса агьалийриз аниз атун четин жезва. Гьаниз килигна, чна мекераяр шегьердин къене кьиле тухудай тежриба давамарда”, — алава хъувуна премьер-министрди.
Жасмина Саидова
