2018-йисан 4-ноябрдиз Дагъустан Республикадин лайихлу артист Эмирбегов Нуруллагь Эмирбегович рагьметдиз фена.

Н. Эмирбегов Ацегь райондин Хуьруьгрин хуьре 1965-йисуз дидедиз хьана. Хуьруьгрин юкьван школа куьтягьай жегьил Дагъустандин государственный филармониядиз музыкантвилин къуллугъдал кьабулна.

С. Гьажибегован тIварунихъ галай музыкальный училище куьтягьайдалай гуьгъуьниз Н. Эмирбегова аялрин музыкальный школада кIвалахна. Яргъал йисара ада Ахцегьрин музыкальный школадин филиалдин директор яз зегьмет чIугуна.

Районда ва республикада кьиле тухузвай культурадин гзаф кьадар мярекатра, музыкальный фестивалра, конкурсра гьевесдивди иштиракунай ва музыкантдин устадвал къалурунай Н. Эмирбеговаз гьуьрметдин хейлин грамотаяр, дипломар гана. Кьиблепатан Дагъустандин халкьарин фольклордин суварик устадвилелди ва активвилелди иштиракунай Н. Эмирбеговаз «Дагъустан Республикадин лайихлу артист» лагьай гьуьрметлу тIвар гана.

Нуруллагь Эмирбеговаз вич чидай гьар са чкада ватандашрин ва гьакI маса халкьарин векилрин, иллаки культурадин, искусстводин работникрин арада еке гьуьрмет, авторитет авай. Ада кемендал, скрипкадал, далдамдал еке устадвилелди лезги ва маса халкьарин макьамар, гьаваяр тамамардайла, яб акалзавайбур гьейран хьана амукьдай. Ада кIанивилелди ва ашкъидивди вичин буба, бажарагълу кеменчи, Дагъустан Республикадин культурадин лайихлу работник Эмирбег Эмирбегован рехъ тарифлудаказ давамарна.

Нуруллагь Эмирбегован бажарагъди, устадвили, алакьунри, халкьдин музыкадал рикI хьуни, ада кемендай акъудзавай гуьзел сесери гьейранар тавур кас хьанач. Гьам манидарар, музыкантар, гьам шаиррар, ашукьар, культурадин деятеларни.

Нуруллагь Эмирбегов хьтин ксар, вири уьмуьр милли искусстводиз, музыкадиз бахш авур устадар, абуру тунвай экуь гел яргъалди багърийрин, дустарин ва ам чидай, адан гуьзел музыкадихъ садра кьванни яб акалай инсанрин, хайи халкьдин культурадихъ, искусстводихъ рикI кузвай ватандашрин рикIера амукьда.

Мурад Саида ва «Лезги газетдин» редакциядин коллективди Нуруллагь Эмирбегован хизанриз ва  мукьва-кьилийриз башсагълугъвал гузва.

Бубайри хьиз кеменчедик чан кутаз,

Фестивалрик гьар жуьредин ван кутаз.

Алахъна вун гуьрчегариз чи Ватан,

Культурадиз багъишзава на ви чан.

 

Манийрин сел ава жаван танда ви,

Скрипкади вуч ажайиб ванда ви,

Чуьнгуьрдик чан, зуьрнедин ванар кутаз,

Меркезрани агалкьунар кIанда ваз.

 

Гьар са чIавуз фасагьат я рахун ви,

Дегиш жеда винел патан акун ви.

Гуьзел уьмуьр виш йис хьурай я Аллагь,

Агалкьунар мубаракиз, Нуруллагь.

Тикрарбенд.

Межлисрин кьилеваз,

Тар, чуьнгуьр гъилеваз,

Багьа тIвар виневаз,

Чан Нуруллагь.

 

Далдамдин кIан гатаз,

Манийрик чан кутаз,

Дерейрик ванн кутаз,

Хьурай вун!

АЛВАН ШАГЬЭМИРОВА

***

Бубадин хва тIвар ганва ваз,

Бубад кеменч зар ганва ваз,

ЧIехи уьмуьр бар ганва ваз,

Лауреатвилин тIвар мубарак.

 

Са пудкъад йис яш хьанва ваз,

Сенят кардин тахт хьанва ваз,

Мад пудкъад тIалабзава ваз,

Лауреатвилин тIвар мубарак.

 

Ашукь Шемшир пара шад я,

Атанва зун вун рикIеваз.

Манидалди чуьнгуьр рахаз

Лауреатвилин тIвар мубарак.

АШУКЬ ШЕМШИР