Россиядин виридалайни кьибле пата авай регионда гьавадин шартIар субтропикра жедай хьтинбур я. И гафарин гьахълувал Дагъустан Республикадин кьибледа авай сергьятдал алай, сармашухдиз ухшар набататар къулайдаказ экъечIзавай Самурдин таму тестикьарзава — идаз тамамдаказ ухшар там дуьньяда саки авач лагьайтIа жеда.

Ина берекатлу чиликай хкатзавай къарасуйриз, вацIариз куьтуьмар къвезвайди я. Мегьарамдхуьруьн райондин мулкунал гьакIни субтропикриз хас емишрин, месела, хурмадин тарар экъечIзава. Абурун бул бегьерди рикI шадарзава. Хурмадин тарар райондин саки вири агьалийрин багълара ава. Зегьметдал рикI алай чи халкьди вичин вири такьатар ва къуватар жуван ватанэгьлияр, Россиядин шегьеррин агьалияр патал лазим хуьруьн майишатдин суьрсет гьасилуниз серфзава. Амма, гьайиф хьи, гьар зулухъай, бегьер вахчудай вахт агакьайла, инсанар кIевера гьатзавайди якъин жезва. Халкьдиз бегьер гьиниздатIа чин тийиз, гьа са вахтунда, чи шегьеррин базарар къецепатан уьлквейрай гъанвай, багьа къиметрай маса гузвай продукциядивди ацIанваз жезва. И месэладиз лазим фикир тагуни чи шегьерар ва районар хсуси хуьруьн майишатда гьасилнавай суьрсетдикай магьрум хьунал гъизва.

Къецепатан суьрсет маса къачуналди, чна къунши уьлквейрин экономикаяр хуьз куьмекзава. Гьа са вахтунда хайи халкьдивай вичин зегьметдилай хийир къачуз жезвач, инсанар кесибвиле гьатзава, гележег хъсан хьуникай умудар атIузва.

Зи фикирдалди, чкадин самоуправленидин органри гьасилнавай суьрсет маса гунин месэладиз лазим кьадар фикир гузвач. Эгер хуьруьн майишатдин зегьметчийриз и карда куьмек хьанайтIа, абурулай банкарай къачунвай кредитарни вахтунда вахкуз алакьдай, хуьруьн майишатдин хаммал гьялдай промышленностни вилик фидай, инсанризни и хиле зегьмет чIугваз ашкъи-гьевес жедай. Къенин йикъан гьакъикъат лагьайтIа ахьтинди я хьи, лезги халкьдин асул кеспийрикай сад тир багъманчивал яваш-яваш квахьдай чкадал къвезва.

Жалалдин Абдуразакьов