И йикъара «Докъузпара район» МР-дин кьил Абдурагьим Алискерован теклифдалди райондин сергьятра «Къацу километрияр» лишандик кваз, экологиядиз талукь гегьенш серенжем кьиле фена.

Метлеблу акцияда райондин кьил Абдурагьим Алискерова, адан заместителри, райондин тешкилатринни идарайрин вири руководителри, къуллугъчийри, хуьрерин администрацийрин кьилери, анрин пешекарри ва жемятди иштиракна.

Экологиядиз талукь республикадин «Къацу километрияр» акциядин эстафета Докъузпаради Мегьарамдхуьруьн райондивай кьабулна. Къейд ийин, республикадин сергьятра и серенжем РД-дин кьил Владимир Васильеван теклифдалди кьиле тухузва.

Докъузпара райондиз гьахьдай чкадин мулкара, республикадин метлеб авай рекьин кьве патайни, 2 гектар кьван чилин участокда акциядин иштиракчийри машмашрин 600 къелем цана.

«Чун и серенжемдал сергьятламиш хьана акъваздач. Район къацу авунин мураддалди чна ихьтин крар гележегда мадни давамарда», — лагьана Докъузпара райондин кьил Абдурагьим Алискерова.

Серенжемдин важиблувиликайни метлеблувиликай рахадайла райондин кьил А.Алискерова алава хъувурвал, гележегда райондин сергьятрал ацалтзай республикадин шегьре рекьин вири участокда кьве патайни къелемар цада. Идалайни гъейри, райондиз гьахьдай рекьин сергьятдал эцигдай махсус таж (арка) гьазуруниз талукь проектни заказнава.

Чи мухбир