И йикъара Докъузпара райондин райондин администрациядин заседанийрин залда райондин кьил Абдурагьим Алискерова кIвалахдин рекьяй нубатдин совещание кьиле тухвана. Совещанидин кIвалахда райондин кьилин заместителри, хуьрерин администрацийрин кьилери, идарайрин жавабдар къуллугъчийри иштиракна. 

Совещание ачухуналди, Абдурагьим Алискерова иштиракчияр йикъан месэлайрихъ галаз танишарна. 2018-йисан IV-кварталда налогар кIватIунин пландин жигьетдай кIвалах кьиле физвай гьалдикай экономикадин отделдин начальник Султанмурад Магьмудова гьахъ-гьисаб гана.  Рахунрин эхирдай ада алава хъувурвал, райондин къене налогрин къуллугъда регистрация авачиз кIвалахзавайбурухъ галаз икьрарар кутIунунин рекьяй кIвалахар давам жезва.

С. Магьмудован гафарай, республикадин «100 мектеб» программадин сергьятра аваз Къаракуьре ва Къалажух хуьрерин мектебрин дараматра ремонтдин кIвалахар са кьадарда кьилиз акъуднава.

Дагъустан республикадин кьил Владимир Васильева сифте кьил кутур  «Къацу километрияр» акциядин эстафета кьабулунин жигьетдай Докъузпара районда тамамвилелди гьазурвилер акунва.

Эхирдай алукьзавай ЦIийи йисан мярекатриз гьазурвал акуникай ва Усугъчай хуьруьн хъвадай цин месэладикайни веревирдер кьиле фена.

«Лезги газет»