Республикадин умуми образованидин  24  идарада рекьера гьерекат авунин къайдаяр чирдай  ва и жигьетдай вердишвилер къачудай  махсус комплексар тайинарнава, хабар гузва РД-дин образованидин ва илимдин министерстводин сайтди.

Ана къейднавайвал, авто-комплексар шегьердин  рекьерин сетар — светофорар, шегьрейрин чилерал чIугунвай цIарар, рекьерин лишанар   тамамдаказ  тикрарзавай майданар я.

Ихьтин майданар арадал гъанвай школайра  танишардай ва гъавурда твадай  мярекатар кьиле фенва. Стенд-тренажердин куьмекдалди алава образованидин муаллимри  рекьерал адет яз жезвай дуьшуьшар  арадал гъизва,  мектебда кIелзавай аялри лагьайтIа, масадан куьмек галачиз лазим къарар кьабулзава ва хатасуз маршрут жагъурзава.

Авто-комплексар министерстводи  государстводин “РД-да  2015-2020-йисара  общественный къайда  таъминарун ва тахсиркарвилериз  аксивал авун” программадик акатзавай “2015-2020-йисара рекьера гьерекатдин хатасузвал артухарун”  подпрограммадин сергьятра аваз  къачунва.

Программадин сергьятра аваз  гьакIни  аялриз ва жаванриз рекьерани транспортда хасаратвилер хьунин  вилик пад кьунин кIвалахни тухузва.  Школайра   муаллимриз куьмек яз  методикадин материалар гьазурнава, аялрин бахчайра  и месэладиз талукь яз пипIер туькIуьрнава, диде-бубайрихъ галаз  гъавурда твадай гуьруьшар тухузва ва икI мад.

Чи мухбир