Деве-къуш. Садазни сир туш, къушарикай дуьньяда виридалайни екеди деве-къуш (страус) я. Адан кьакьанвал 2,7 метрдив, заланвал 150 килограммдив агакьун мумкин я. Цавай лув гуз алакьдачтIани, деве-къуш лап йигиндиз катда. Са сятда адавай 70 километрдиз чукуриз жеда.
Казуар. Екевилел гьалтайла, казуар кьвед лагьай чкадал ала. Австралияда ва адан къваларив гвай островрин тамара и къуш виридалайни екеди я. Саки кьве метрдин кьакьанвал ва 60 килограммдин заланвал жедай ам лув гун тийидайбурукай я.
Пингвин. И къушра це йигиндиз сирнавда. Пингвиндин кьакьанвал 130 сантиметр ва заланвал 45 килограмм кьван хьун мумкин я. Адет яз, пингвинар Антарктидадин муркIарин юкьва яшамиш жеда. Абуру цин кIаник 15 декьикьада дурум гуда.
Альбатрос. Лув гудай къушарикай виридалайни еке лувар (3,7 метр кьван) альбатросдихъ ава. Им гьуьлуьн чIехи къуш я.
Къугь. Дуьньядал алай лап гуьрчег къушарикай сад къугь (лебедь) я. Екевилел гьалтайла, ам вад лагьай чкадал ала.
Бурма пеликан. Пеликан яргъи кIуф ва туьтуьхдик чанта квай, це сирнавдайбурукай чIехи къуш я. Яргъи кIуфун куьмекдалди адавай цяй, са четинвални авачиз, балугъар кьаз жеда.
ЧIулав гриф. И къушран заланвал 13 килограмм кьван жеда. Гриф як недай вагьши къуш я. Абур Кьиблепатан Европадин ва Юкьван Азиядин дагълара яшамиш жезва.
Дурна. Кьакьанвилел 90-180 сантиметр кьван алатIани, дурнадин заланвал 10 килограммдилай виниз жедач.
Кьукь. И къушран заланвал 20 килограмм кьван я. ЧIехи къуш ятIани, адавай лув гуз жезва.
Лекь. Ам чIехи къушарин жергеда цIуд лагьай чкадал ала.
Гьазурайди — Куругъли Ферзалиев
