И мукьвара Ахцегь муниципалитетда райондин Общественный палатадин председатель Али Исмаилован регьбервилик кваз и тешкилатдин гегьенш заседание кьиле фена. Адан кIвалахда райадминистрациядин кьилин заместитель Алмас Шуаева, УСЕЗ-дин (эцигунрин сад тир заказчидин управление) начальник Алихан Ибрагьимова, школайрин директорри, общественный тешкилатрин ва чкадин СМИ-рин векилри иштиракна.
Веревирдзавай кьилин месэла РД-дин регьбер Владимир Васильева кьил кутуналди кьабулнавай “100 школа” проект районда уьмуьрдиз куьчуьрмишзавай гьал ахтармишун тир.
— Мурад-метлеб иллаки хуьруьн чкадин школайра муаллимриз агалкьунралди кIвалахдай ва аялриз дурумлу чирвилерни тербия къачудай къулай шартIар яратмишун тир и надир программа Ахцегь райондани активнидаказ кардик акатун тебрикуниз лайихлу я. Гьелбетда, и программа райондин кьил Осман Абдулкеримован ва баркаллу карчияр-меценатар тир “Куджа” СПК-дин председатель Наира Палчаевадинни (ада Ахцегьрин 1-нумрадин школа ремонтиз куьмекзава) “Кристалл-Сити” ООО карханадин гендиректор Ибрагьим Мегьамедгьуьсейнован ватанпересвални жумартвал себеб яз кардик ква, — къейдна совещание ачухай Али Исмаилова. Гуьгъуьнлай рахай УСЕЗ-дин начальник Алихан Ибрагьимова школаяр ремонтунин кIвалахар кьиле физвай гьалдикай малумат гана.
Республикадин Минэкономразвитиядин “100 школа” конкурсда иштиракуникди Ахцегьрин 1-нумрадин школадин дарамат гуьнгуьниз хкун патал гьукуматди 2 млн. манат ва Къурукаларин СОШ-диз 1 млн.500 агъзур манат пул чара авунва. Алай вахтунда анра ремонтрин кIвалахар бегьем жезва, — лагьана ада.
— Чина спортзал ремонтзава, са кьадар классра полар, пенжерар дегишарнава, электропроводка цIийи хъувунва… Райадминистрацияди цIийи 200 стол ва 400 стул къачунва. Классра чимивал таъминарун патал 21 тонн къванцин цIивин хканва, гьа са вахтунда чимдай къурулуш тIебии газдик кутунин кIвалахар давамарзава. 1-январдилай школа тIебии газдалди чимдайвал я, — малумарна Ахцегьрин 1-нумрадин школадин завуч Шарваф Миспагьова.
Къурукаларин СОШ-дин директор Эдуард Магьмудова къейд авурвал, и школадани цIийи полар язава, аялриз тIуьн гудай чка туькIуьрзава. Вири кIвалахарни, гьелбетда, Ахцегьрин школада хьиз, тарсариз кьецI тагана тамамарзава.
Совещанидал рахай Ахцегьрин ООШ-дин директор Майрам Рамазановади 2019-йисан гьа ихьтин программадик чпин школани кутун тIалабна. “Зурба алим ва арифдар Ахцегь Мирзе Алидин медресадикай 1928-йисуз туькIуьр хъувунвай чи школадин дараматди (1710 кв. метр, 230 аялди кIелзава) алай вахтунда девирдин истемишунриз ерли жаваб гузвач. Къведай йисуз республикадин школайрин конкурсда иштиракун патал чна спонсор жагъурнава ва лазим тир чарар-цIарар гьазурзава”, — лагьана ада.
Райадминистрациядин кьилин заместитель Алмас Шуаеван рахунрай малум хьайивал, алай вахтунда Дагъустанда 1461 школа ава. Анра 400 000-дав агакьна аялри кIелзава. Санлай 274 агъзур аялди кIелзавай 546 школади бинедилай ремонт истемишзава. Гьукуматдихъ цIийибур эцигдай ва авайбур гуьнгуьниз хкидай такьатар тахьуниз килигна, РД-дин Кьил Владимир Васильева республикадин “100 школа” программа кьабулнава. Конкурсдай акъатай гьар са школадиз тахминан 2 млн. манат пул — республикадин, 5% — чкадин бюджетрай ва эцигунриз акъатзавай пулунин са пайни спонсорди гузва. Ахцегь районда типовой анжах кьуд школа ава: Ахцегьрин 1 ва 2-нумрайринбур, КьакIарин ва Хуьруьгрин школаяр. ЦIи республикада и программадай 100-дан чкадал 117 школа гуьнгуьниз хкизва. АкьалтIай важиблуди тир и месэладал гуьзчивалун патал гьар жуьмя юкъуз РД-дин образованидинни илимдин министр Уммупазил Омаровадин регьбервилик кваз видеосовещанияр тешкилзава. Къведай йисуз и программадик 100 ваъ, 150 школа кутадайвал я. Гьелбетда, и месэлада чун мадни активламиш хьана кIанда. Гьар са хуьре агьвал квай ватанперес, жумарт спонсорар ава. Куьмекиз абур гьазур я. Абурун мумкинвилер ишлемишун — им чи хуьрерин школаяр гуьнгуьниз хкидай хъсан мумкинвал я.
Дашдемир Шерифалиев
