Алай йисуз муаллимрин йикъан вилик Хив райондин Цналрин хуьруьн юкьван школада еке межлис хьанай. Суварин мярекатдиз вири муаллимар, аялар, абурун диде-бубаяр кIватI хьанвай. Абуру Муаллимрин югъ ва 56 йисуз гьа и школада аялриз дерин чирвилер ва дуьзгуьн тербия гайи, жемятдиз сейли муаллим, вичин хушуналди школада кIвалахдилай элячIнавай Рамазанов Абдулашим Саидович ял ягъиз рекье тун къейдзавай.
РД-дин лайихлу муаллим, РФ-дин умуми образованидин гьуьрметлу работник, зегьметдин ветеран Рамазанов Абдулашиман уьмуьрдин рекьикай и школада саки 30 йисалай виниз муаллим, школадин завуч, директор яз кIвалахай тарихчи – обществовед, и цIарарин автор Велибегов Рамазана суьгьбетна.
— Абдулашим муаллим куьрпе аял яз, дяведин четин йисара диде-бубадикай магьрум хьана, чIехи диде-баде Гьалимата уьмуьрдин шегьредал акъудна. Ада хуьре ирид йисан школа, Хивдин школа-интернатда 10-класс ва ДГУ-дин филфак агалкьунралди куьтягьна.
Абдулашим муаллимдин зегьметдин книжкада авайди анжах са кхьин я: 1962-йисан 1-сентябрдилай 2018-йисан 1-сентябрдалди 56 йисан вахтунда хайи хуьруьн школада аялриз-акьалтзавай несилдиз дерин чирвилер ва мягькем тербия гана.
Ада тербия ва чирвилер гайи вишералди аялрикай муаллимарни духтурар, алимарни инженерар, спортсменарни устIарар, маса кеспийрин иесияр хьанва.
Абдулашим Саидович аялрал ва вичин кеспидал рикI алай вафалу пешекар тирди мадни а карди тестикьарзава хьи, ада районда сифте яз хайи дидед чIал ва литература дериндай чирунин месэлаяр школадин, райондин администрациядин образованидин отделдин, вилик са шумудра гъана. Муаллим — методист яз, ада Цналрин юкьван школада 1970-йисалай дидед чIаланни литературадин лап хъсан кабинет тешкилна. Дидед чIалал яратмишдай аялрин “Чубарукар” тIвар алай кружокни арадал гъана. Райондин, республикадин газетриз “Аялрин сирлу алемдай” рубрикадик кваз абуру теснифай шиирар, гьикаяяр макъалаяр акъудиз, аялрин гьевес хкажиз хьана.
Ам хуьруьн юкьван школадин ва райондин дидед чIаланни литературадин муаллимрин методсекциядин руководитель ва школайра муаллимрин кIвалах ахтармишдай штатдик квачир инспекторни тир.
Абдулашим муаллимди вичин веледар ва тарс гузвай аялар дидед чIалал ва литературадал рикI алаз тербияламишна, абуру школадин, райондин, республикадин олимпиадайра сад лагьай чкаяр кьаз хьана. Олимпиадайра агалкьунралди иштиракай 8 кас имтигьанар авачиз ДГУ-дин филологиядин факультетдиз кьабулна. Абуру вузни агалкьунралди куьтягьна, хуьре ва маса чкайра урус, лезги чIаларин ва литературайрин муаллимар яз кIвалахзава.
ДГУ-дин филфак акьалтIарна, чпин пешедай кIвалахзавай муаллимри — вахар тир Фарида ва Мадина Идрисоври ингье вуч лугьузватIа:
— ДГУ-дин профессор Гьажи Гашарова чи муаллимдин тариф авурла, чун цавук хкIунай. Алимди Абдулашим муаллимдиз, адан рухвайриз ва чаз чирвилер гайиди я. Профессорди ам «хци дергесдив» гекъигнай…
Ветеринариядин илимрин доктор Нурдин Будулева вичиз тарс гайи муаллимдин тариф гилани ийизма.
РикIел гъил эцигна, за лугьузва: Абдулашим муаллим хьтинбур хуьре хьун, хайи школада аялриз чирвилер, тербия гун цналвийрин чIехи бахт я. Ада гайи тарсар, насигьатар зи рикIелай садрани алатдач.
Ада школада кIвалахзавай вахтунда жемятдихъ галаз сих алакъада аваз, хуьруьн ва школадин парторганизациядин секретарь, профорганизациядин председатель яз, общественный кIвалахар вини дережада аваз кьиле тухвана.
Райондин, республикадин газетризни журналриз А.Рамазанова вишелай виниз илимдинни тербиядин, экономикадинни яшайишдин месэлайриз талукь макъалаяр кхьена.
Адакай райондин «Октябрдин экв» ва республикадин “Коммунист” (“Лезги газет”) газетрин штатдик квачир мухбир хьана.
Бажарагълу муаллимдикай ва адан кIвалахдин тежрибадикай пешекар журналистри газетрин чинриз макъалаяр акъудна.
За лагьайтIа, Абдулашим муаллимдиз шиир теснифнава:
Аялзамаз четинвилер акуна,
Назик беден азиятрик хьанай ви.
Малаик хьиз са, бадедин гъил кьуна,
Сифте камар шегьре рекьел гъанай ви.
КIел авуна, кIвачел-кьилел алачиз,
Дарискъалда лап четин тир йисара.
Яваш-яваш гъам-хажалат алудиз,
Илимд рекьел элячIна вун ашкара.
Хкяна на мергьяматлу четин рехъ
Чи аялриз дерин илим чирунин.
Хабар гана, рикIера на туна экв,
Гьар са касдин, хайи хуьруьн — Цналрин.
Рамазан Велибегов
