Лезги милли журналистикадив, чи руьгьдин къулав чIехи магьрумвал агакьна. Яргъалди чIугун тавур залан азардикди вичин 80 йисан юбилей и мукьвара къейд авур машгьур журналист, публицист, хъсан руководитель ва тешкилатчи, гъейратлу инсан ва дуст, гьуьрметлу хизандин кьил, чи газетдиз яргъал йисара кьилин редакторвал авур хва, РФ-дин ва РД-дин культурадин лайихлу работник Агъариза Узаирович Саидов рагьметдиз фена. Гьайиф…
А.У.Саидов 1938-йисуз Ахцегь райондин Къутунхърин хуьре лежбердин хизанда дидедиз хьана. Ахцегьа юкьван школа, Каспийскда ПТУ, Дондал алай Ростовда журналистикадин факультет акьалтIарна, 1961-йисалай инихъ ада вичин вири уьмуьр лезги милли культурадиз, журналистикадиз, чи хайи газетдиз бахшна. Ина ам, литработникдилай гатIумна, кьилин редактордин дережадиз кьван хкаж хьана. 55 йисуз ам лезги миллетдин юкьва вичин хци къелем, михьи, гьахълу гаф гваз хьана. Ада кIвачелай тавур пIипI Кьиблепатан Дагъустанда бажагьат ама.
20 йисалай гзаф вахтунда, чебни уьлкве чукIурай алаш-булашдин йисара, ам газетдин редакциядин кьиле хьана, газет хвена, адан патав бажарагълу журналистар, писателар, алимар, художникар, политикар, общественный деятелар тупламишна. Газет республикада виридалайни еке тираж авай, хушвилелди кIелзавай, метлебдив ацIайдаз элкъуьрна. Редакция тадаракралди, цIийи техникадалди, материалралди таъминарна. Виридалайни вилик компьтеррин мягькем база яратмишна.
Агъариза Узаирович са лезгийриз ваъ, вири миллетрин векилриз мукьва ва сейли тир, гзаф крара жегьил журналистар ва редакторар адал алукьдай.
Лезги халкьдин кар алай месэлаяр гьялиз, ада гьам журналист, гьам редактор, гьам общественно-политический деятель яз иштиракна. Адан зегьмет государстводин чIехи наградаяр, гьуьрметдин тIварар гуналди къейднава. Журналистикадай адаз Гьажибег Гьажибегован, Мегьамед Гьажиеван, «Шарвили» эпосдин фондунин премияр гана.
Агъариза Узаировича гьахьтин бажарагълу ва гьуьрметлу хизанни арадал гъана. Адан хва Самура яргъал вахтунда, газетдин компьтеррин база арадал гъиз, зегьмет чIугуна.
2017-йисалай инихъ А.У.Саидова ял язавай. Гьайиф хьи, залум ажалди адаз, уьмуьрдал ашукь яз, вичин экуь рехъ давамардай мумкинвал ганач. Чна, дериндай яс чIугунивди, рагьметлудан уьмуьрдин юлдашдиз, рухвайриз, сусариз, хтулриз, вири багърийриз, вири ахцегьвийриз башсагълугъвал гузва.
Агъариза Узаирович Саидован экуь къамат чи рикIерай садрани акъатдач.
«Лезги газетдин» редакциядин коллектив.
