“Лезги газетдиз” Дербент райондин администрациядин пресс-къуллугъди хабар гайивал, мукьвара Белиж поселокда ял ядай цIийи парк пайда жеда.

И йикъара “Формирование современной городской среды” программадин сергьятра аваз парк арадал гъунин кIвалахар кьиле физвай гьалдихъ галаз райондин кьилин везифаяр вахтуналди тамамарзавай Фуад Шихиев таниш хьана.

Пудратчи карханадин векилдин гафарай малум хьайивал, вири патарихъай аваданламишдай цIийи паркуна сейр ийидай махсус рекьер, аялар патал кьилдин майдан, ял ядай кьур квай чкаяр туькIуьрда, скамейкаяр эцигда. Парк экIя хьанвай мулкунин умуми майданди 2,2 га тешкилзава. Инаг Белиждин агьалийриз вижевай савкьат жеда.

“Вири кIвалахар 15-декабрдалди акьалтIарун герек я. Парк ачухдалди са югъ амаз, субботникни кьиле тухунин лазимвал ава. Мукьвара поселокдин агьалийривай чпин азад вахт къулай шартIара акъудиз жеда. Аваданламишунин кIвалахар райондин ял ядай ихьтин шартIар тешкилунин игьтияж авай маса хуьрерани давамардайвал я”, —  лагьана Фуад Шихиева.

Гуьгъуьнлай Дербент райондин кьил поселокда авай кьакьан мертебайрин кIвалин гьаятдиз фена ва ана аваданламишунин кIвалахар кьиле физвай гьалдиз килигна.

«Лезги газет»