Махачкъалада вад лагьай мертебадай аватзавай аял къутармишай Тагьир Мегьамедовавни Айдемир Кулдуевав Дагъустандин гьукумди шабагьар вахкана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Саласа юкъуз абурухъ галаз республикадин премьер-министр Артем Здунов, РД-дин Кьилин ва Гьукуматдин Администрациядин руководитель Владимир Иванов, РД-дин Халкьдин Собранидин вице-спикер Камил Давдиев ва Россиядин МЧС-дин Дагъустанда авай Управленидин начальник Нариман Къазимегьамедов гуьруьшмиш хьана.
Къейд ийин хьи, агьвалат алай йисан 8-декабрдиз Дагъларин уьлкведин меркездин Ватан микрорайонда арадал атана. Аял къутармишнавай дуьшуьшдикай гуьзчивалдай камерайрин куьмекдалди хабар хьана. Тагьир Мегьамедован гафаралди, адаз садлагьана вад лагьай мертебадин пенжердин карниздикай куьрс хьанвай аял акуна. Ада тадиз куьмекдиз Айдемир Кулдуеваз эверна. Аял аватдайди чир хьайи абур ам кьаз гьазур хьана. Шукур Аллагьдиз, гена вири регьятдиз алатна. Вад йис хьанвай аялдал куьлуь-шуьлуь хирер хьанатIани, ам сагъ-саламат я. Къутармишайбурукай садан гъил тIар хьана.
Малум хьайивал, аял кIвале текдиз амай. Буба кIвалахал алай, диде туьквендиз фенвай.
Гуьруьшдал Владимир Иванова хабар гайивал, ада Артем Здуновахъ галаз санал РД-дин Кьил Владимир Васильевавай къутармишайбуруз государстводин шабагьар гун тIалабда. Нариман Къазимегьамедовани вичи РФ-дин МЧС-дин министрдин вилик Т.Мегьамедовазни А.Кулдуеваз ведомстводин шабагьар гунин месэла эцигдайдакай лагьана.
Лагьана кIанда, къутармишайбуруз Махачкъаладин мэрдин везифаяр вахтуналди тамамарзавай Мурад Алиева гьуьрметдин грамотаяр, абуру кIвалахзавай транспортдин компаниядин регьберди премияр гана.
«Лезги газет»
