Дербент шегьердин электросетар фадлай инихъ авай ва кIвенкIвечи карханайрикай сад я. Гьамиша хьиз, цIини планламишнавай вири кIвалахар гатфарин ва гатун варцара вахтунда ва хъсан ери аваз тамамарунин нетижада карханадин коллектив электроэнергия ишлемишзавай абонентрин вилик уьзягъ я – хъуьтIуьн шартIара шегьерэгьлияр электроэнергиядин барадай дарвиле гьатдай къурхулувал ва себебар авач.
Мукьвара чахъ галаз хьайи суьгьбетда электросетрин кьилин инженер ва гьа карханадин ветеран Алик Халидович Агъаханова лагьана:
— Алай вахтунда Дербент шегьерда цавай тухванвай электролинийрин кьадар санлай къачурла саки 370 километрдиз барабар я. 115 трансформаторрин тадаракарни фикирда кьурла, гьелбетда, чи карханадиз чIехи майишат лугьуз жеда. ТIвар кьунвай трансформаторрин кьадардикай 2 Гагаринан ва Умурдинован куьчейра куьгьнебурун чкадал цIи эхцигнавайбур я. И артуханвилини агьалияр ва тешкилатар электроэнергиядалди ара датIана ва лазим тир кьадарда таъминардай мумкинвал гузва.
ХъуьтIуьз вахтунда гьазурвилер акунин план – графикдин бинедаллаз винидихъ къалурнавай вири ЛЭП-ар ахтармишнава, абурукай 17 километрдин мензилдин яргъивал авайбур капитальнидаказ ремонтнава. Шегьердин куьчеяр, паркар ва кьилин майдан ишигълаван авунин кIвалахни хейлин хъсанарнава, иллаки къати марфарин вахтунда электрикдин линияр замыкание тахьун патал 10 километрдилайни яргъи электротрассадин рекье гьалтзавай тарарин хилер атIанва.
Адет тирвал, электроэнергетикадин карханаяр хъуьтIуьз гьазур хьанвай гьал «Дагестанская сетевая компания» АО-дин махсус комиссияди чкайрал атана ахтармишзавайди я. Шад жедай кар ам я хьи, гьамиша хьиз цIини Дербент шегьердин электросетрин карханадин коллективдин кIвалахдиз хъсан къимет ганва ва анаг хъуьтIуьз тамамвилелди гьазур тирвилин паспорт вахканва.
Гзаф миллетрин векилри зегьмет чIугвазвай и кархана тежрибалу пешекарралди машгьур я. Электромонтерар тир А.Абдурагьманован, Б.Акперован, В.Салманован, А.Исаеван, старший мастер, сад лагьай категориядин инженер Ж.Мирземетован ва кабельный линийрин мастер Н.Гьасанован тIварар кьилин инженерди иллаки чIехи гьуьрметдалди кьуна. Чпин дурумлу, зегьметдалди ва мягькем низамлувилелди абуру карханадин вири коллективдиз чешне къалурзава.
Жувазни лап мукьувай чидай, вични гзаф къени, чарадан дерди-баладикай хабар кьадай, алакьдай куьмекни гудай кьегьал лезги, карханадин гуьзгуь (адаз кIвалахдин юлдашри гьуьрметдалди гьа икI лугьузва) ери-бине Кьурагь райондин Бахцугърин хуьряй тир Жамирзе Мирземетовакай заз са кьадар гегьеншдиз лугьуз кIанзава. Пешекар инженер-энергетик яз, ада гьар са кас патал чарасуз герекди тир и хиле чешнелудаказ зегьмет чIугваз 30, гьа гьисабдай яз Дербент шегьердин электросетра – 18 йисалайни гзаф вахт я.
Медени ва дамах гвачир кас тир адаз вичин тариф авун хас туш. Ам гьихьтин дережадин пешекар ятIа къалурун патал кьвед-пуд мисал.
Пешедин рекьяй “Дагэнергодин” отличник, Дагъустандин Кьиблепатан зонадин акъажунра (энергетикрин арада) сад лагьай чкадин сагьиб, Дагэнергодин лап хъсан мастер, Кеферпатан Кавказдин лап хъсан мастер, Вологда шегьерда кьиле фейи акъажунра РФ-дин энергетикрин арада тежрибалу пешекар ва икI мад — ибур вири адан агалкьунар къалурзавай делилар я.
Уьмуьрда, вичи кIвалахзавай коллективда Жамирзе Мирземетован активвал къалурзавай мад са мисал. Ам «Лезги газетдин» амадаг, вафалу дустни я. Карханада кIвалахзавай лезгийриз газет кхьин меслят къалурун, абурун рикIел вахтунда хкун ада вичин намусдин кар яз гьисабзава. Адахъ галаз санал и кIвалахдал гуьзчивал Алик Агъахановани ийизва.
Сагърай чеб!
Нариман Къарибов
