( Эвел — 46-48-нумрайра )
* * *
Чи куьгьне хуьрерин агьалийри, чеб гьина аватIани, ихьтин тежрибадикай менфят къачуртIа, са шакни алачиз, чи хуьрерал чан хкведа. Ахцегь, Рутул, Кьурагь, Хив, Агъул, Мегьарамдхуьруьн, Докъузпара районрани чкIанвай хуьрер гзаф ава. Анрихъ рикI кудай жегьил къуватар тербияламиш тавуртIа, бубайрин ерийрал чан хкведач.
“Миресрин йикъар”, “Хуьрерин йикъар”, маса суварар, мярекатар тешкилун гьа тербиядин са хел тушни бес!
* * *
Куьгьне ДаркIушрал зун Севзихан муаллимди Абдулкъадир Сайдумов хайи кIвалин бинейрихъ, ам къекъвей ягъварихъ галазни танишарна. Анални лап куьгьне тарарикай сад аламай, анаг хуьзвай къаравул хьиз. Зи рикIел чIехи артистдин 70 йисан юбилейдиз бахш авур шиир хквезва:
Устадрин устад, арифрин ариф!
Четин жезва заз авун ви тариф.
Къиметрин гафар хьайиди хьиз кьит,
КичIезва кIуь жез ва гьакIни жез шит.
Вуч суьгьуьр я ви сивеллай хъуьруьн!
Туькьуьл язни ам жеда хьи ширин!
Гатун зегьемда ви гаф я серин,
ХъуьтIуьн гурвада — ялав! Аферин!
Ви судни вав гва, ви дуванни вав —
“Фундугъбегрив” мад ягъиз тадач ав!
Диганвайди яз хуьда Лезги тав,
КуькIуьда адал ви илгьамдин цав!..
За фикирзава, ДаркIушрин къадим мулкарал артистдин руьгь, тIебиат дири я… Хуьр арадал хкиз алахънавай рухвайри хуьзвайдини гьа руьгь, гьа илгьам тушни бес! Ам, эбеди къуват яз, несилрив гумукьда!..
Ихьтин илгьам даркIушвийриз маса чIехи хцини багъишзава — Керим Селимович Керимова. Адаз РФ-дин лайихлу архитектор лагьай тIвар гайила, чна ам икI тебрикнай:
Мертебайрин сан
Мад хьурай кьакьан!
Ви гьуьрметарни,
Эй, азиз инсан!
Ингье “Миресрин йикъа” заз, кхьизвай касдиз, гьикьван цIийи къуватар ва темаяр багъишнатIа! Дуьньяни къанажагълу миресрин къени къулари, крари хуьзвайдал шак алач…
Мердали Жалилов
