Сулейман-Стальский райондин администрациядин пресс-къуллугъди хабар гайивал, Эминхуьре Дагъустандин шииратдин классик Етим Эминан тIварунихъ цIийи музей эцигзава. Адаз финансрин жигьетдай куьмек машгьур меценат Эмирбег Амаханова вичи агакьардайди хиве кьунва.
Эминхуьре икьван чIавалди кардик квай шаирдин музей авай дарамат кутугай гьалда амачир. Адан гьакъиндай газетдани са шумудра кхьейди я. Хуьруьн ва райондин администрацийрихъ музейдин цIийи дарамат эцигдай такьатар авачир. Эмирбег Амаханова ихьтин гьалдай экъечIдай рехъ жагъурна, вичин куьмек теклифна. И кардикай ада шаирдин 180 йисаз талукь яз районда кьиле тухвай мярекатдал малумарна.
РикIел хкин, идалай вилик Эмирбег Амаханова вичин харжийрихъ куьгьне Ялцугърин хуьре шаирдин сур жагъур хъувуна, адал цIийи къван хкажнай. Алатай йисуз Э.Амаханова шаирдин куьгьне хуьр авай ЯркIарин дередиз вад километрдин мензилдиз машин фидай рехъ туькIуьр хъувуна. Алай вахтунда гьа дереда пуд километрдиз электрикдин цIийи линияр тухузва. Идалай кьулухъни меценатди и дереда хуьруьн майишат арадал хкун патал хейлин крарик кьил кутун хиве кьунва.
Райондин кьил Нариман Абдулмуталибова Эмирбег Амахановаз ада райондин хийирлу крарик датIана вичин куьмекдин пай кутазвайвиляй рикIин сидкьидай сагърай лагьана. Нариман Шамсудиновича къейд авурвал, Етим Эминан яратмишунрихъ несилар халисан ватандашар яз тербияламишунин жигьетдай кьетIен метлеб ава. ЦIийи музейди шаирдин ирс чи несилриз мадни мукьва ийида, акьалтзавай жегьил – жаванар тарихдин къадир авайбур, марифатлубур, руьгьдин жигьетдай къуватлубур, обществодиз вафалубур яз тербияламишиз куьмек гуда. Ада мадни къейдна хьи, Эмирбег Амаханова дарамат хкажиз куьмекда, мумкинвал авай маса ксарихъ галаз санал ам тадаракламишда.
Эминхуьре спонсорвилин куьмекар гунин тежрибадикай идалай виликни чизвай. Месела, Шагьпаз Асаханован куьмекдалди “Эминан кIелунар” лишандик кваз аялри лезги чIалал лап хъсандиз шиирар кIелунин конкурсар тешкилна.
Лезги халкьдин чIал, литература, культура хуьник вичин лайихлу пай Имам Яралиев кьиле авай «Умуд» тIвар алай мергьяматлувилин фондунини кутазва. Етим Эминаз цIийи музей эцигуник ва ам тадаракламишуникни вири халкьди чпин пай кутада.
Гъилевай йис и районда Етим Эминан йис яз малумарнава.
«Лезги газет»
