РД-дин бюджетдиз къвезвай налогар артухарунин макьсаддалди Мегьарамдхуьруьн районда АЗС-рин хиляй алвердин кIвалахрал машгъулбур ахтармишун патал махсус десте арадал гъанва. И гьакъиндай «Лезги газетдиз» райадминистрациядин пресс-къуллугъди хабар гузва.
Дестедин руководитель райондин кьилин заместитель А.Гьажиев я. ГьакIни аник райондин администрациядин, налогрин идарадин, къайдаяр хуьдай органрин, МЧС-дин ва ЦЗС-дин векилар акатнава.
КIвалахдин пландин бинедаллаз, 5-6-декабрдиз ахтармишунин дестеди чкайрал физ, рейдар кьиле тухвана. Серенжемдин вахтунда абуру райондин сергьятра авай 9 АЗС-дин кIвалах ахтармишна. Кьилди къачуртIа, абуру гьар са АЗС-дин документар, кIвалахдин икьрарар ахтармишна.
Кьиле тухвай серенжемдин асас макьсад АЗС-рин кIвалах закондив кьурвал авун я.
«Лезги газет»
