Ватандин ЧIехи дяведин йисара хайи чил душмандикай хуьз фронтдиз хизанралди кьегьалар фена. Ахьтинбурук Ахцегь райондин КьакIарин хуьряй тир Исмаиловрин хизанни акатзава. Инай фронтдиз 6 стха фенай: Исмаил, Тажудин, Наби, Нагъи, Шагьабас, Нурудин. ГьакI кьве хтулни – Бейдулагь ва Зейнидин. Кар алайди ам я хьи, вирида къизгъин женгера иштиракна ва хайи хуьруьз хуруйрал орденар алаз хтана. 5-декабрь Шагьабас Исмаилован хайи югъ тирвиляй къе чна адан уьмуьрдин рекьикай ихтилатда. За адахъ галаз хейлин йисара санал кIвалахна ва ам государстводин, партиядин гьихьтин зурба деятель тиртIа чизва.
Хуьруьн 7 йисан школада кIелай Шагьабас Исмаилова Дербентдин педучилище куьтягьна. КIвалахиз ам Агъул райондиз рекье туна. Ина кар алакьдай жегьил ВЛКСМ-дин райкомдин сад лагьай секретарвиле хкяна. 1940-йисуз ам гуьгьуьллувилелди Яру Армиядин жергейриз фена.
Къуллугъдин сифте йисара Ш.Исмаилова военно-политический училищеда ва командирар гьазурдай курсара кIелна. 1942 — йисан апрелдилай 1945-йисан майдалди Исмаилова Карелиядин фронтда батареядин командирдин, дивизиондин штабдин начальникдин везифаяр тамамарна. Белоруссиядин фронтда адал дивизиондин штабдин начальникдин везифаяр ихтибарна.
Ш.Исмаилован женгинин лайихлувилерикай сад ам я хьи, ада космический станцийрин гележегдин генеральный конструктор С.Королевахъ галаз Берлиндин къваларив гвай артиллериядин яракьар гьазурзавай немсерин заводдин инженервилинни техниквилин пешекарар женгер авачир чкадиз акъудна. Адаз Королев хъсандиз чидай. Берлин патал женгера иштиракдайла, Ш.Исмаиловал хер хьана ва ам госпиталдиз аватна. Ина ам вичихъ гелкъвезвай медсестра Сычова Александрадал ашукь хьана ва кьакIави офицерди урус рушахъ галаз сир сад авуна.
Фронтда мадни тажуб жедай хьтин агьвалат хьана: Исмаиловрин 4 стха — Тажидин, Шагьабас, Наби ва Нагъи Берлиндин куьчейра чеб-чпел гьалтна. Яру Армияди гъалибвал къачурдалай гуьгъуьнизни Шагьабас Азизовича кьве йисуз Германияда къуллугъ хъувуна. Вичин къуллугъдин везифаяр мукьуфдивди кьилиз акъудай, къизгъин женгера дирибашвилер къалурай Шагьабас Азизович Ватандин дяведин I ва II дережайрин орденриз ва хейлин медалриз лайихлу хьана.
Дагъустандиз хтай жегьил офицер фронтовик республикадин вилик-кьилик квайбуру гъиле-гъилди кIвалахал желбна. Ам ВКП(б)-дин Махачкъаладин горкомда сифте инструкторвиле ва ахпа пропагандадинни агитациядин отделдин заведующийвиле кIвалахиз гатIунна. Гуьгъуьнин йисара Ш.Исмаилова ВКП(б)-дин Рутул райкомдин кьвед лагьай, ахпа сад лагьай секретарвилин везифаяр тамамарна.
Гзаф месэлайрин гъавурда авай ва кар алакьдай пешекар Обкомди кIелунар давамарун патал партиядин кьилин школадиз рекье туна. Анаг тарифлудаказ куьтягьна хтай коммунист ВКП(б)-дин Дагъустандин обкомдин административный ва финансрин отделдин заведующийвиле тайинарна. ДАССР-дин министррин советдин председателдин заместителвиле кIвалахзавай Исмаилов 1961-йисан сентябрдиз Дагъустандин обкомдин секретарвиле хкяна. Ада и йисара республика экономикадин, культурадин рекьяй вилик тухун патал еке зегьмет чIугуна. Гьавиляй адан алахъунар «Знак Почета», «Зегьметдин Яру Пайдах», Халкьарин дуствилин орденралди ва медалралди къейдна.
ТIвар-ван авай государстводин, партиядин деятель 1984 – йисан 9-апрелдиз 64 йисан яшда аваз рагьметдиз фена. Къведай йисуз республикади адан 100 йисан юбилей къейдда.
Абдулатип Гьажиев, зегьметдин ветеран, РФ-дин писателрин Союздин член
